गाउँ सहर

समाज सेवाबाट नै समाज लाभान्वित : प्रधानमन्त्री

काठमाडौं । सामाजिक कार्यबाट मात्रै समाजले निस्वार्थ लाभ लिनसक्ने प्रधानमन्त्री शेरबहादुर देउवाले बताएका छन् । 

४३औँ सामाजिक सेवा दिवसका अवसरमा प्रधानमन्त्री देउवाले शुभकामना दिँदै समाज कल्याण परिषद्ले विभिन्न कार्यक्रम सामाजिक सेवा दिवस मनाउन लागेकोमा खुसी व्यक्त गर्दै शुभकामना दिएका हुन् । 

दिगो विकास र आवधिक लक्ष्य प्राप्ति राष्ट्रिय अभियान, समावेशी समाज निर्माणमा सङ्घसंस्थाको योगदान भन्ने मूल नाराका साथ मनाउन मनाउन सुरु गरेको दिवसमा शुभकामना दिनुभएको हो । समाज कल्याण ऐन , २०४९ बमोजिम स्थापित समाज कल्याण परिषद्ले स्थापना कालदेखि नै मुलुकमा समाज सेवाको क्षेत्रलाई प्रवर्द्धन गर्न र गैर सरकारी सङ्घसंस्थालाई समाज कल्याणको क्षेत्रमा व्यवस्थित तवरले परिचालित गर्न महत्त्वपूर्ण भूमिका निर्वाह गर्दै आइरहेको बताएका छन् ।

परिषद्ले स्वास्थ्य तथा शिक्षा सेवाको विस्तार , युवा , महिला , वृद्ध वृद्धा तथा सीमान्तकृत समुदायको सशक्तीकरण , मानव अधिकारको प्रवर्द्धन , उद्धार , कल्याण , आयआर्जन लगायतका विविध कार्यक्रम सञ्चालन गरी हाम्रो समाजलाई लाभान्वित तुल्याउँदै आएको उनले बताएका छन् । 

गैर सरकारी सङ्घसंस्थाले सरकारको विकास सहयात्रीका रूपमा दुर्गम क्षेत्रका सर्वसाधारणको हित र विकासका लागि विभिन्न कार्यक्रम सञ्चालन गर्दै आएकोमा प्रधानमन्त्री देउवाले धन्यवाद दिएका छन् । उनले समाज कल्याणको क्षेत्रमा योगदान गर्ने राष्ट्रिय एवं अन्तर्राष्ट्रिय सङ्घसंस्था तथा समाजसेवीप्रति हार्दिक आभार समेत प्रकट गरेका छन् । 

गाउँ सहर संवाददाता

प्रतिकृया दिनुहोस
प्राप्त प्रतिक्रिया
तपाईँको मत