गाउँ सहर

सांगठनिक गतिविधि नगर्न चेतवानीसहित नेविसंघले विघटन गर्‍यो त्रिवि समिति

• गाउँ सहर संवाददाता
• २७ भदौ सोमबार, २०७९ | १३:३५:०० मा प्रकाशित

काठमाडाैं । नेपाली कांग्रेसको भ्रातृ संस्था, नेपाल विद्यार्थी संघले त्रिभुवन विश्वविद्यालय नेविसंघ समिति विघटन गरेको छ ।

नेविसंघ अध्यक्ष दुजाङ शेर्पाले आज विज्ञप्ति निकालेर नेविसंघ त्रिवि समिति विघटन गरिएको र अब अधिवेशन गरिने बताएका छन् । उनले समितिकाे रिक्तताकाे समयमा कुनैपनि सांगठनिक गतिविधि एवम् नियम विपरित क्रियाकलाप नगर्न नगराउन चेतावनीसमेत दिएका छन् । 

नेविसंघका नाममा पछिल्ला वर्षहरुमा नकारात्मक क्रियाकलापहरु भइरहेको भन्दै केन्द्रले एक्सन लिएको हो ।

अर्को घोषणा नहुन्जेल नेविसंघको नाममा कुनै वक्तव्य निकाल्न नपाइने, केन्द्रसँग अनिवार्य अनुमति लिनुपर्ने, कुनै निर्णय गर्नुपरे व्यक्तिगत लहडबाजीमा नभई आपसी सहमतिमा लिनुपर्ने केन्द्रको निर्णय छ ।

त्रिवि प्रशासनमा लामो समय तालाबन्दी, प्राध्यापकहरुमाथि कुटपिटलगायत घटनाहरुमा नेविसंघका कार्यकर्ताहरु मुछिएकोबारे पनि नेविसंघ केन्द्रले चासो व्यक्त गरेको छ ।

नेपाल विद्यार्थी संघलाई वैधानिक ढङ्गले मूर्त रुप दिन यथाशीघ्र केन्द्रीय प्रतिनिधि खटाइ क्याम्पस अधिवेशन गर्ने प्रतिबद्धता व्यक्त गरेका छन् ।

 

अधिवेशनको वातावरण सिर्जना गरि अधिवेशन प्रक्रियामा सहभागी हुन समेत सबैमा आग्रह गरे ।  अब उप्रान्त केन्द्रीय समितिको परिपत्र, समन्वय तथा निर्देशनबिना त्रिवि समितिको रिक्तताको समयमा कुनै पनि सांगठनिक गतिविधि एवम् नियम विपरीतका क्रियाकलापहरू नगर्न/नगराउनु हुन सम्बन्धित सबैमा अनुरोध समेत गरिएको छ ।  लामो समयदेखि त्रिविमा नेविसंघ भित्रै आन्तरिक विवाद थियो । र उनीहरूले मनोमानी ढंगबाट आफ्ना गतिविधि सञ्चालन गर्दै आएका थिए ।

नेविसंघमा ३२ वर्षे उमेर हद लागेको छ ।

नेविसंघलाई वैधानिक ढंगले मुर्त रूप दिन यथाशीघ्र केन्द्रीय प्रतिनिधि खटाइने पनि उनले बताए । अहिलेसम्म नेविसंघ त्रिवि समितिमा रहेकालाई अध्यक्ष शेर्पाले धन्यबाद पनि दिएका छन् ।