गाउँ सहर

हामीले एक्कासी अनधिकृत संरचनाहरु भत्काउन सुरु गरेका होइनौँ - मेयर वालेन

• गाउँ सहर संवाददाता
• ८ भदौ बुधबार, २०७९ | २०:२६:०० मा प्रकाशित

काठमाडाैँ । काठमाडाैँका मेयर वालेन्द्र शाह (वालेन) ले सूचना दिएर नै अनाधिकृत संरचना भत्काएकाे बताएका छन् । उनले सरसल्लाहमा काेहिपनि नआएकाे समेत बताए ।

उनले भनेका छन्, "हामीले एक्कासी अनधिकृत संरचनाहरु भत्काउन सुरु गरेका होइनौँ, ३५ दिने सूचना जारी गरेका थियौँ । तर सो अवधिमा कुनै पनि किसिमका छलफल, सरसल्लाहमा लागि कोही पनि सम्पर्कमा नआउनु भएको तितो अनुभव हामीसँग छ ।

अनधिकृत संरचनाहरुप्रतिको महानगरको अनुगमन लगायतका गतिविधि सधैँ रहनेछन् । यसैले हामी अनुरोध गर्दछौँ कि अनधिकृत संरचनाहरु नबनाइयोस्, बनाएका अनधिकृत संरचनाहरु आफैँले भत्काउनुहोस् । यसका साथै त्यस्ता संरचनाहरु भाडामा लगाउने नगरियोस् ।"

उनले थप भनेका छन् - अनधिकृत संरचनाहरुका भाडावालहरुलाई पर्न गएको असुविधाप्रति हामी दुःख व्यक्त गर्दछौँ । साथै, त्यस्ता संरचनाहरु भाडामा लगाएर भाडावाललाई आर्थिक क्षति पुर्याएवापत् हुन सक्ने कानुनी कारबाही खोजी गरेर अनधिकृत संरचनाका मालिकहरुबाट क्षतिपूर्ति गराउने तर्फ महानगरले हदैसम्मको पहल गर्ने विश्वास दिलाउँन चाहन्छौँ ।