गाउँ सहर

सप्तकोशी नदी आसपासको क्षेत्रमा हाइ अर्लट, तटीय क्षेत्रमा नजान र सावधानी अपनाउन सर्वसाधारणमा आग्रह

इनरुवा । सप्तकोशी नदी आसपासको क्षेत्रमा प्रशासनले हाइ अर्लट जारी गरेको छ । नदीको जलस्तर अस्वभाविक बढ्ने आंकलन गरिएकाले तटीय क्षेत्रमा उच्च सर्तकता अपनाएको सुनसरी प्रशासनले जनाएको छ ।

पूर्वी भेगमा जारी अविरल वर्षाका कारण नदीको जलस्तरमा अस्वभाविक वृद्धि देखिएकाले तटीय क्षेत्र र आसपास उच्च सर्तकता अपनाइएको सुनसरीका प्रमुख जिल्ला अधिकारी इन्द्रदेव यादवले बताए ।

यादवले नदीमा बाढीको उच्च सम्भावना देखिएकाले सबै स्रोत, साधनका साथै सुरक्षाकर्मी तयारी अवस्थामा राखिएको जानकारी दिए । उनले नदीको अस्वभाविक वहावका कारण कोशी ब्यारेजमा पानीको सतह ५ लाख क्यूसेकको हाराहारीमा पुग्न सक्ने देखिएकाले ब्यारेजमा समेत सर्तकता बढाइएकोे बताए ।

यसैबीच कोशीको बाढीलाई मध्यनजर गर्दै सप्तरी तर्फ समेत प्रशासनले हाइ अलर्ट गरेको छ । जिल्ला प्रहरी कार्यालय सप्तरीका प्रहरी उपरीक्षक अभिनारायण काफ्लेले कोशी आसपासको क्षेत्रमा हाइ अलर्ट जारी गरिएको बताए ।

सुनसरी र सप्तरी प्रशासनले नदीमा बाढीको खतरा बढेकाले तटीय क्षेत्रमा नजान र सावधानी अपनाउन सर्वसाधारणमा आग्रह समेत गरेको छ ।

गाउँ सहर संवाददाता

तपाईँको मत