गाउँ सहर

१ कराेडकाे घरजग्गा धिताे राख्दा ३० लाख ऋण, नयाँकाे लागि १ कराेड ५० लाख रुपैयाँसम्म कर्जा पाउने

काठमाडौँ । काठमाडौँ उपत्यकामा १ करोड रुपैयाँ बजार मूल्य भएको जग्गा धितो राख्दा ३० लाख रुपैयाँ मात्रै ऋण पाइने भएको छ  । नेपाल राष्ट्र बैंकले सार्वजनिक गरेको आर्थिक वर्ष २०७९/८० को मौद्रिक नीतिमार्फत प्रयोजन नखुल्ने ऋण दिँदा मार्केट भ्यालुको ३० प्रतिशत मात्रै ऋण पाउने व्यवस्था गरेको हाे ।

यस अघि यस्तो खालको ऋण लिँदा उपत्यकामा ४० प्रतिशत र उपत्यका बाहिर ५० प्रतिशतसम्म कर्जा पाउने व्यवस्था थियो ।

अब बैंक तथा वित्तीय संस्थाबाट घरजग्गा धितो राखेर विविध शीर्षकमा कर्जा लिँदा उपत्यकामा भए बजार मूल्यको ३० प्रतिशत र उपत्यका बाहिर भए बजार मूल्यको ४० प्रतिशत मात्रै ऋण पाइने भएको छ ।

राष्ट्र बैंकले बैंक तथा वित्तीय संस्थाले घर/जग्गा धितो राखी निश्चित प्रयोजन नखुलेका नयाँ अधिविकर्ष कर्जा, धितो कर्जा, सम्पत्ति कर्जा, व्यक्तिगत आवधिक कर्जा प्रवाह गर्दा कर्जा र सोको धितो सुरक्षणको फेयर मार्केट भ्यालु (चल्तीको बजार मूल्य) बीचको अनुपात काठमाडाैँ उपत्यकाभित्र बढीमा ३० प्रतिशत र अन्य स्थानको हकमा बढीमा ४० प्रतिशतसम्म कायम गर्नुपर्ने व्यवस्था गरेको हो ।

यसको अर्थ काठमाडौँ उपत्यकामा कसैले १ करोड रुपैयाँको घरजग्गा किनेको छ भने उसले अर्को विविध प्रयोजनको लागि ऋण लिनु पर्दा ३० लाख रुपैयाँ मात्रै ऋण पाउने छ । तर पहिलोपटक घर बनाउनको लागि लिइने ऋणमा भने यस्तो व्यवस्था लागू हुने छैन । पहिलोपटक घर बनाउन भने बैंकहरूले ६० देखि ७० प्रतिशतसम्म कर्जा दिँदै आएका छन् ।

पहिलो पटक घर बनाउन १ करोड ५० लाख रुपैयाँसम्म कर्जा पाउने व्यवस्था छ । तर घरजग्गा धितो राखेर फेरि घरजग्गा नै किन्ने वा प्रयोजन नै नखुलाएर लिने मोर्गेज लोनमा भने राष्ट्र बैंकले कडाइ गरेको छ ।

गाउँ सहर संवाददाता

तपाईँको मत