गाउँ सहर

कांग्रेसका उपसभापति धनराज गुरुङसहित पाँच जना चढेकाे गाडी दुर्घटना

• गाउँ सहर संवाददाता
• १६ असार बिहीबार, २०७९ | ११:०५:०० मा प्रकाशित

काठमाडौं । नेपाली कांग्रेसका उपसभापति धनराज गुरुङ चढेकाे गाडी दुर्घटना भएकाे छ । 

दाेलखाबाट रामेछाप फर्कने क्रममा उपसभापति गुरूङसहित रामेछापका महाधिवेशन प्रतिनिधि रत्न कार्की, ललितपुर जिल्ला सदस्य सानुबाबु महर्जन लगायत पाँच जना चढेकाे बा १९ च १८३९ नम्बरको स्कार्पियो गाडी आज बिहान दुर्घटना भएकाे छ । 

महाधिवेशन प्रतिनिधि रत्न कार्कीका अनुसार गाडी सामान्य दुर्घटना भएकाे तर भाग्यवश हामी ठूलो दुर्घटना बचेकाे बताए ।

गाडी आज बिहान रामेछापको गोगनेमा सडक किनारबाट चिप्लिएर तल झरेको छ ।

उपसभापति ट्वीटरमा गाडीको फोटो राख्दै लेखेका छन्, ‘ठूलो घटना हुनबाट जोगियो ! रामेछाप गोगनेमा हामी चढेको गाडी अचानक सडक किनारबाट तल गयो तर अगाडि ढुंगाको ओट लाग्न पुगेकाले ठूलो घटना हुनबाट जोगियो । भगवानको कृपाले हामी सबै सकुशल छौं’ लेखेका छन् । 

दुर्घटनामा परे पनि  अहिले सबै सकुशल रहेको कार्कीले जानकारी दिए ।

उनीहरु ओखलढुंगा घर भएका कांग्रेस केन्द्रीय सदस्य प्रदीप सुनुवारकी श्रीमतीको निधन भएकाले परिवारलाई भेटेर रामेछापकाे कार्यक्रममा सहभागी हुन फर्किंदै थिए ।