राजनीति

नेपाली कांग्रेस र गठबन्धनको पक्षमा आएको परिणामले नेकपा एमाले अत्तालियाे

• गाउँ सहर संवाददाता
• २ जेठ सोमबार, २०७९ | १४:३९:०० मा प्रकाशित

काठमाडौँ । नेपाली कांग्रेसले स्थानीय तह निर्वाचनमा कांग्रेस र सत्तारुढ गठबन्धनको पक्षमा आएको प्रारम्भिक नजिताले नेकपा (एमाले) अत्तालिएको बताएको छ ।

सोमबार कांग्रेसका प्रवक्ता प्रकाशशरण महतले विज्ञप्ति जारी गर्दै एमाले महासचिव शंकर पोखरेलले आइतबार सरकारले स्थानीय तह निर्वाचनमा राज्यशक्ति दुरुपयोग गरी धाँधली गरेको भन्ने आरोपको खण्डन गरेका हुन् ।

प्रवक्ता महतले एमालेको आरोपले पार्टीको ध्यानाकर्षण भएको जनाएका छन् ।

'यही वैशाख ३० गते सम्पन्न स्थानीय तह निर्वाचनका सम्बन्धमा प्रमुख प्रतिपक्षी दल नेकपा (एमाले) द्वारा नेपाल सरकार र सत्ता गठबन्धनप्रति लगाएको आरोपप्रति हाम्रो गम्भीर ध्यानाकृष्ट भएको छ । निर्वाचनमा नेपाली कांग्रेस र गठबन्धनमा सहभागी अन्य दलहरूको पक्षमा आएको परिणाम र देशभरका पालिकामा मत गणनाको प्रारम्भिक नतिजाको प्रवृत्ति (रुझान) ले नेकपा (एमाले) अत्तालिएको हामीले पाएका छौं,' कांग्रेसको विज्ञप्तिमा उल्लेख छ, 'प्रधानमन्त्री शेरबहादुर देउवाको परिपक्व, सुझबुझपूर्ण र दूरदर्शिताका कारण संघीय लोकतान्त्रिक गणतन्त्रात्मक संसदीय व्यवस्थाको रक्षा र संविधानको संरक्षण तथा कार्यान्वयनका लागि साझेदार दलहरूका बीचमा स्थानीय तह निर्वाचनमा कतिपय ठाउँहरूमा तालमेल सम्भव भयो र अन्य ठाउँहरूमा मित्रवत प्रतिस्पर्धा भयो ।'