राजनीति

आगामी निर्वाचन अग्रगमन र प्रतिगमनको लडाइँ हो, माओवादीले जित्दा मात्रै राष्ट्र सुरक्षित छ : प्रचण्ड

• गाउँ सहर संवाददाता
• २४ चैत बिहीबार, २०७८ | १६:३४:०० मा प्रकाशित

काठमाडाैं । सत्ता साझेदार दल नेकपा माओवादी केन्द्रका अध्यक्ष पुष्पकमल दाहाल ‘प्रचण्ड’ ले आगामी निर्वाचन सामान्य निर्वाचन मात्र नभई न्याय र अन्याय, अग्रगमन र प्रतिगमन बीचको लडाइँ भएको बताएका छन् । 

बिहीबार सिराहामा आयोजित सहिद रामप्रताप साह प्रवेशद्वार तथा नगर अस्पताल भवन शिलान्यास कार्यक्रममा उनले देशमा संविधान र गणतन्त्र उल्ट्याउन दक्षिणपन्थी र हिजोका राजावादीबीच साँठगाँठ बढेको पनि बताए ।

यसकारण देशमा प्राप्त महत्वपूर्ण उपलब्धिलाई जोगाउन पनि स्थानीय, प्रादेशिक र संघीय निर्वाचनमा पार्टीले जित्नैपर्ने भन्दै उनले पहिला माओवादीले संघियता छोडेको भ्रम दिने कोसिस भएको बताए ।

गएको वर्षमा प्रतिगमनलाई परास्त गर्न सफल भयौं, मधेसमा जागरण, साँचो अर्थमा माया गर्ने, निरन्तर लड्ने भएकोले पनि निर्वाचनमा माओवादीको पक्षमा लहर आउने उनको भनाइ छ । माओवादीले जित्दा मात्रै राष्ट्र सुरक्षित छ, उनले भने ।