गाउँ सहर

सर्वोच्चको न्यायाधीशमा श्रेष्ठ र उच्च अदालतमा कुँवर सिफारिस

• गाउँ सहर संवाददाता
• २६ फाल्गुण बिहीबार, २०७८ | १९:५४:०० मा प्रकाशित

काठमाडौं । न्यायपरिषदले उच्च अदालत विराटनगरका मुख्यन्यायाधीश तिलप्रसाद श्रेष्ठलाई सर्वोच्च अदालतको न्यायाधीशमा सिफारिस गरेको छ।

 

बिहीबार बसेको न्याय परिषदको बैठकले उनलाई सर्वोच्च अदालतको न्यायाधीशमा सिफारिस गरेको न्यायपरिषदका प्रवक्ता मानबहादुर कार्कीले जानकारी दिए ।

यस्तै, सर्वोच्च अदालतका मुख्य रजिष्ट्रार लालबहादुर कुँवरलाई उच्च अदालतको न्यायाधीशमा नियुक्तिका लागि सिफारिस गरेको छ ।

अब श्रेष्ठको नाम संसदीय सुनुवाइका लागि पठाइने छ भने कुँवरलाई अब कामू प्रधानन्यायाधीश दीपककुमार कार्कीले उच्च अदालतको न्यायाधीशमा नियुक्त गर्नेछन् ।

 

संसदीय सुनुवाइ समितिबाट नाम अनुमोदन भएमा तिलप्रसाद श्रेष्ठ २०८३ भदौ १३ गतेसम्म सर्वोच्च अदालतको न्यायाधीश हुनेछन् ।

सर्वोच्च अदालतमा एक जना न्यायाधीशको पद खाली थियो। सर्वोच्चमा प्रधानन्यायाधीशसहित २१ जना न्यायाधीश हुने व्यवस्था छ ।