राजनीति

सुन आयातमा कडाइ, दैनिक कोटा १० किलोमा झारियाे

काठमाडौं । यसअघि दैनिक २० किलोसम्म सुन आयात गर्न पाईने व्यवस्थामा नेपाल राष्ट्र बैंकले नयाँ नियम लागू गरेकाे छ । 

नेपाल राष्ट्र बैंकले आईतबार एक परिपत्र जारी गर्दै सुन आयातको कोटा घटाएको छ । नयाँ नियम अनुसार अब दैनिक १० किलो मात्रै सुन आयात गर्न पाईने भएको छ ।

यसअघि दैनिक २० किलोसम्म सुन आयात गर्न पाईने व्यवस्था थियो । यस्तो हुँदापनि व्यवसायीहरुले सुनको पूर्ति गर्न नसकेको बताउँदै आएका थिए ।

व्यवसायीहरुले सुन आयातको कोटा बढाउन बेलाबेलामा राष्ट्र बैंकमा लबिङसमेत गर्ने गरेका छन् । आईतबार अन्तरराष्ट्रिय बजारसँगै नेपालमा समेत सुनको मूल्य बढेसँगै राष्ट्र बैंकले आयात कोटा घटाएको हो ।

यसअघि राष्ट्र बैंकले पहिलो चरणको लकडाउनमा पनि अर्थतन्त्रमा नकारात्मक असर पर्ने भन्दै सुन आयातको कोटा २० बाट घटाएर १० किलो पुर्याएको थियो । त्यसपश्चात अर्थतन्त्र चलायमान भएपछि पुनः बढाएर दैनिक २० किलो आयात गर्न पाउने पुरानै व्यवस्थालाई निरन्तरता दिएको थियो ।

रेमिट्यान्स घट्ने र आयात बढ्ने कारणले विदेशी विनिमय सञ्चितिमा दबाब परेपछि सुनको आयातका कडाइ गरिएको राष्ट्र बैंकको दाबी छ । मौद्रिक नीतिको समीक्षमार्फत नै उसले विलाशीताको वस्तुमाथि नियन्त्रण गर्ने बताएको थियो ।

चालु आर्थिक वर्षको माघसम्म नेपालमा ३ हजार ६४३ किलो सुन आयात भइसकेको छ । उक्त परिमाणमा सुन आयातका लागि मुलुकबाट २५ अर्ब २१ करोड ६८ लाख रुपैयाँ भन्दा धेरै रकम बाहिरिएको भन्सार विभागले जनाएको छ ।

गाउँ सहर संवाददाता

तपाईँको मत