राजनीति

कृष्णनगरका मेयर शाह, वडाध्यक्षसहित हजार जना नेपाली कांग्रेसमा प्रवेश

• गाउँ सहर संवाददाता
• २२ माघ शनिबार, २०७८ | १६:११:०० मा प्रकाशित

 

कपिलवस्तु । कपिलवस्तुको कृष्णनगर नगरपालिकाका नगर प्रमुख (मेयर) रजतप्रताप शाह नेपाली कांग्रेस पार्टीमा प्रवेश गरेका छन् ।

२०७४ सालमा स्वतन्त्रबाट चुनाव जितेका शाह शनिबार कांग्रेस प्रवेश गरेका हुन् ।

कपिलवस्तुको बहादुरगञ्जमा आयोजित पार्टी प्रवेश कार्यक्रममा नेपाली कांग्रेसका प्रदेश सभापति अमरसिंह पुन र पूर्व सभापति सुरेन्द्रराज आचार्यले शाहलाई पार्टीमा स्वागत गरेका थिए ।

शाह लामो समय स्वतन्त्रबाट राजनीति गर्दै आएका थिए । उनको प्रवेशले पार्टीलाई थप बलियो बनाउने कांग्रेस सभापति पुनले बताए ।

नगरप्रमख शाहसहित कृष्णनगरका तीनजना वडा अध्यक्षसमेत कांग्रेसमा प्रवेश गरेका हुन् ।

शाहसहित एक हजार जना नेपाली कांग्रेसमा प्रवेश गरेको नेपाली कांग्रेस कपिलवस्तुले जनाएको छ । 

शाह त्यस क्षेत्रका सांसद अभिषेक प्रताप शाहका काका हुन् ।