गाउँ सहर

अध्यक्ष केपी ओलीले छानेका वरिष्ठ उपाध्यक्ष, महासचिव र उपमहासचिव निर्विरोध निर्वाचित

• गाउँ सहर संवाददाता
• १३ मङ्सिर सोमबार, २०७८ | १२:२०:०० मा प्रकाशित

काठमाडाैं । नेकपा एमालेको महासचिव पदमा शंकर पोखरेल निर्वरोध निर्वाचित भएका छन् । अध्यक्ष केपी ओली र भीम रावल चुनावी प्रतिस्पर्धामा रहेका बेला महासचिवमा भने पोखरेल निर्विरोध निर्वाचित भएका हुन् । त्यस्तै वरिष्ठ उपाध्यक्षमा इश्वर पोखरेल, उपमहासचिवमा प्रदीप ज्ञवाली, पृथ्वी सुब्बा गुरुङ र विष्णु रिमाल पनि निर्विरोध निर्वाचित भएका छन् ।

पदाधिकारीमा ओलीले घोषणा गरेका वाहेक तीन जनाको मात्रै उम्मेदवारी परेको छ । अध्यक्षमा स्वंम ओलीसँग भीडन भीम रावल, उपाध्यक्षमा घनश्याम भुसाल र सचिवमा भीम आचार्यको उम्मेदवारी परेको निर्वाचन समितिले जनाएको छ ।

नेकपा एमालेको महासचिव पदका लागि कसैको पनि उम्मेदवारी नपरे पछि शंकर पोखरेल निर्विरोध हुने भएका छन् । बिहान १० बजेको समयसीमाभित्र पोखरेलको मात्र उम्मेदवारी दर्ता भएको हो ।

निर्वाचन आयोगले औपचारिक घोषणा गर्न भने बाँकी छ ।