गाउँ सहर

आगलागीमा दुई बालबालिकाको मृत्यु

• गाउँ सहर संवाददाता
• १२ मङ्सिर आइतबार, २०७८ | ११:३७:०० मा प्रकाशित

काठमाडाैं । चितवनको राप्ती नगरपालिकाको एउटा घरमा आगलागी हुँदा दुई जना बालबालिकाको जलेर मृत्यु भएको छ । राप्ती नगरपालिका १ मैनाटारस्थित जीतबहादुर रुम्बाको घरमा शनिबार आगलागी भएको थियाे । 

आगलागीमा परी जितबहादुरको छोरा तर्फको नाति ३ वर्षीय सुरज र उनकै छोरी तर्फको ३ वर्षीय नातिनी मनिसा तामाङको जलेर मृत्यु भएको जिल्ला प्रहरी कार्यालय चितवनले जानकारी दिएको छ ।

आगलागीबाट घर, घरमा भएको लत्ताकपडा, खाद्यान्न, भाडाकुँडा पूर्ण रुपमाजलेर नष्ट भएको छ । घरमा अभिभावक नभएको समयमा आगलागी भएको जिल्ला प्रहरी कार्यालय चितवनका प्रवक्ता तथा प्रहरी नायब उपरीक्षक नरहरि अधिकारीले जानकारी दिएका छन् ।

सोलारको ब्याट्री सर्टको कारण आगलागी भएको अनुमान गरिएको छ । शनिबार घटना भए पनि विकट पहाडी क्षेत्र भएकाले आइतबार मात्र घटनाको जानकारी गराएको प्रहरीले जनाएको छ । शव परीक्षणका लागि भरतपुर अस्पतालमा पठाइएको  प्रहरीले बताएकाे छ ।