गाउँ सहर

बुधबारदेखि सर्वोच्च अदालत नियमित सुचारु हुने, प्रधानन्यायाधीश विरुद्धको विद्रोह विफल

• गाउँ सहर संवाददाता
• ३० कार्तिक मंगलबार, २०७८ | १६:१५:०० मा प्रकाशित

काठमाडाैं । बुधबारदेखि सर्वोच्च अदालत नियमित प्रक्रियामा अघि बढ्ने भएको छ । बारको आन्दोलन र न्यायाधीशहरुको इजलास बहिष्कारले दुई सातादेखि सुनुवाई प्रभावित हुँदै आएकोमा आज ६ न्यायाधीशहरु इजलासमा फर्किएर मुद्दाको सुनुवाई गरेसँगै नेपाल बारको आन्दोलन कमजोर हुने अनुमान गरिएको छ । बारले प्रधानन्यायाधीश चोलेन्द्र शमशेर जबराको राजीनामा मागेर आन्दोलन गर्दै आइरहेको छ  । बारले आज पनि सर्वोच्च अदालत परिसरमा धर्ना कार्यक्रम आयोजना गरेको थियो ।

आज न्यायाधीशहरु तेजबहादुर केसी, कुमार रेग्मी, प्रकाश ढुंगाना, कुमार चुडाल, बमकुमार श्रेष्ठ र मनोजकुमार शर्मा इजलास फर्किएपछि बारको आन्दोलन विफल हुने विश्लेषण गरिएको छ । आज न्यायाधीशद्धय श्रेष्ठ र शर्माको इजलासले चारवटा मुद्दाको सुनुवाइ गरेर आदेश दिएको छ । त्यस्तै, तेजबहादुर केसी र कुमार चुडालको संयुक्त इजलासले पनि मुद्दा सुनुवाइ गरेको छ ।

प्रधानन्यायाधीश जबराको राजीनामा नआएसम्म बहसमा नजाने र आन्दोलन जारी राख्ने भन्दै आएको बारमा पनि वकिलहरु विभाजित छन्  । प्रकाश ढुंगाना र कुमार चुडालको इजलासले भने एउटा बन्दीप्रत्यक्षीकरणको मुद्दामा आदेश जारी गरेको छ । बारकै पूर्व अध्यक्ष शेरबहादुर केसी आन्दोलनमा सहभागी भएका छैनन् ।

केसीले न्यायाधीशहरुले सुनुवाई बन्द गर्नु गलत भएको धारणा सुरुदेखि नै राख्दै आएका छन् । 

सर्वोच्च अदालतमा प्रधानन्यायाधीश चोलेन्द्र शमशेर जबराविरुद्धको विद्रोह विफल भएको छ । विद्रोहमा उत्रिएका १९ न्यायाधीशमध्ये अधिकांश ब्याक भएपछि विद्रोह विफल भएको हो ।