गाउँ सहर

प्रधानन्यायाधीश राणाकाे जवाफ : 'म राजीनामा दिन्नँ, दिनैपरे विवादमा तानिएका सबैले राजीनामा दिनुपर्छ'

• गाउँ सहर संवाददाता
• ९ कार्तिक मंगलबार, २०७८ | १३:१५:०० मा प्रकाशित

काठमाडाैं । प्रधानन्यायाधीश चोलेन्द्र शमशेर जबराले आफूले राजीनामा नदिने न्यायाधीशहरूलाई जवाफ दिएका छन् । जबराले विवादमा आएका सबै न्यायाधीशले राजीनामा दिने हो भने आफू पनि तयार रहेको बताएका छन् ।

उच्च स्राेत अनुसार 'विवादमा अरु न्यायाधीशको पनि कुरा आएको छ । विवादमा आएका सबैले राजिनामा दिनुपर्छ । त्यसरी दिने हो भने म तयार छु । होइन भने म राजीनामा दिन्नँ । सडकबाट उठेका विषयमा राजीनामा गर्ने हो भने न्याायलय बच्दैन', उनले भने। 

मंगलबार बिहान सर्वोच्च अदालतका १५ जना न्यायाधीशहरूसँगको छलफलमा प्रधानन्यायाधीश जबराले आफू संवैधानिक बाटोबाट आएको र संवैधानिक हिसाबले नै बाहिरिने बताएको सर्वोच्च स्रोतले जानकारी दियो । 

मंगलबार उनलाई भेट्न पुगेका सर्वोच्च अदालतकै १५ न्यायाधीशले राजीनामा गर्न सुझाएपछि राणाले यस्तो प्रस्ताव अघि सारेका हुन्। नभए आफूले मात्र राजीनामा नदिने उनको अडान छ । 

मन्त्रिपरिषद् भागबन्डा मागेको लगायतका विषयमा प्रधानन्यायाधीश राणा विवादमा तानिएका छन् । राजीनामा गर्न उनलाई चौतर्फी दबाब छ । 

प्रधानन्यायाधीशसँगको छलफल र सामूहिक छलफलका कारण मंगलबार पनि इजलास प्रभावित हुने भएको छ । सोमबार पनि न्यायाधीशहरू इजलासमा नबसेर आपसी छलफलमा जुटेका थिए ।

सोमबार ​न्यायाधीशहरूले प्रधानन्यायाधीशले राजीनामा गरेर मार्ग प्रशस्त गर्नुपर्ने निष्कर्ष निकालेका थिए । चार पूर्वप्रधानन्याधीश, पूर्व न्यायाधीशको र नेपाल बार पनि प्रधानन्यायाधीशको राजीनामा माग गरेको छ ।