स्वास्थ्य

विश्वमा कोरोना संक्रमितको संख्या २३ करोड ३० लाख नाघ्याे, नेपालकाे अवस्थामा सुधार

• गाउँ सहर संवाददाता
• १२ असोज मंगलबार, २०७८ | ०८:२४:०० मा प्रकाशित

काठमाडौँ ।  विश्वमा कोरोना संक्रमितको संख्या २३ करोड ३० लाख नाघेको छ ।

वर्ल्डोमिटर्सका अनुसार पछिल्लो २४ घण्टामा ३ लाख ४१ हजार ४६५ जना संक्रमित भएका छन् । पछिल्लो विवरणसँगै मंगलबार बिहान ८ः१६ सम्म विश्वभर संक्रमितको संख्या २३ करोड ३० लाख ७२ हजार १४९ पुगेको छ ।

सक्रिय संक्रिमतको संख्या १ करोड ८५ लाख १९ हजार ४३१ छ । यसमध्ये ९२ हजार १६८ जनाको अवस्था गम्भीर रहेको वर्ल्डोमिटर्सले जनाएको छ ।

यस्तै विश्वभर अहिलेसम्म २० करोड ९७ लाख ८३ हजारभन्दा बढीले कोरोना भाइसको संक्रमणलाई जितेका छन् । पछिल्लो २४ घण्टामा ४ लाख ३८ हजार ११२ जना संक्रमणमुक्त भएका छन् ।  पछिल्लो २४ घण्टामा संक्रमित हुनेभन्दा संक्रमण मुक्त हुनेको संख्या झण्डै एक लाखले बढी छ ।

पछिल्लो २४ घण्टामा ५ हजार ३२ जनाको मृत्यु भएको छ । योसँगै कोरोनाले ज्यान गुमाउनेको संख्या ४७ लाख ६९ हजार ३०८ पुगेको छ ।

बहुसंख्यक नागरिकलाई खोप लगाइएपछि विश्वको सबैभन्दा प्रभावित संयुक्त राज्य अमेरिकामा संक्रमण लगभग नियन्त्रणमा आइसकेकोमा फेरि महामारी बढ्न थालेको छ ।

पछिल्लो २४ घण्टामा त्यहाँ ६४ हजार १८६ जनामा संक्रमण भएको छ । यस्तै थप ५५१ जनाको मृत्यु भएको छ । योसँगै अमेरिकामा ७ लाख ७ हजार ९६८ जनाको मृत्यु भइसकेको छ ।

यसैगरी ब्राजिलमा ५ लाख ९४ हजार ७०२ जनाको मृत्यु भएको छ । दोस्रो लहरले अति प्रभावित मुलुक भारतमा भने संक्रमण घटेको छ ।

दैनिक ४ लाखसम्म संक्रमण देखिएको भारतमा अहिले दैनिक औषत ३० हजार संक्रमित देखिन थालेका छन् । भारतमा बुधबार बिहानसम्म ४ लाख ४७ हजार ४०६ संक्रमितको मृत्यु भएको छ ।

नेपालमा पछिल्लाे २४ घण्टामा ७ जनाकाे मृत्यु भएकाे छ भने ९६.२ प्रतिशत निकाे हुने रहेका छन् । खाेपकै कारण अवस्था अहिले सुध्रिएकाे बताइएकाे छ ।