गाउँ सहर

कुलमानले दाेस्राे कार्यकालका लागि बुझे नियुक्तिपत्र

काठमाडाैं । सरकारले नेपाल विद्युत प्राधिकरणको कार्यकारी निर्देशकमा कुलमान घिसिङलाई नियुक्त गरेको छ । आज ऊर्जामन्त्री पम्फा भुसालको उपस्थितिमा ऊर्जा मन्त्रालयका सचिव देवेन्द्र कार्कीले घिसिङलाई नियुक्तिपत्र दिएका हुन् ।

गत सोमबार बसेको मन्त्रिपरिषद् बैठकले कुलमानलाई कार्यकारी निर्देशकमा नियुक्ति गर्ने निर्णय गरेको थियो । 

मन्त्रिपरिषद्को बैठकले कार्यकारी निर्देशक हितेन्द्रदेव शाक्यलाई भने विशिष्ट श्रेणी (सचिव) सरह र अहिले खाईपाई आएको सेवा सुविधालाई यथावत राखी जल तथा उर्जा आयोगको पूर्णकालीन सदस्यमा ४ वर्षका लागि नियुक्त गरेको छ ।

पहिलो ४ वर्षे कार्यकाल पूरा गरेर २०७७ भदौ ४ गते विदा भएका घिसिङ दोस्रो पटक कार्यकारी निर्देशक नियुक्त भई विद्युत प्राधिकरणमा आएका हुन् ।

प्राधिकरण नेतृत्वमा आएका घिसिङको दोस्रो कार्यकाल चुनौतीपूर्ण हुने देखिन्छ ।

भुसाल मन्त्री नियुक्त भएदेखि नै उद्योग तथा घरायसी ग्राहकको विद्युत महसुल घटाएर समायोजन गर्ने अभिव्यक्ति दिँदै आएकी छन् । मन्त्रीले भनेको जस्तै गरी विद्युत महसुल घटाएर समायोजन गर्नु पर्ने दवाव उनलाई आउने देखिन्छ । यसाे गर्दा प्राधिकरणले विद्युत बिक्री गरेर गर्ने आम्दानी पनि खुम्चिने छ । 

यस्तै, राजनितिक लोकप्रियताका लागि २० युनिटसम्म खपत गर्ने ग्राहकलाई नि:शुल्क विद्युत दिने घोषणा पनि मन्त्री भुसालले गरिरहेकी छन् । उनको यो घोषणा कार्यान्वयन हुँदा यसको भार प्राधिकरणको वित्तीय स्वास्थ्यमा पर्न जानेछ ।

प्रसारण तथा वितरण प्रणालीको समस्या समाधान, बढ्दो चुहावट नियन्त्रण, कोरोना (कोभिड–१९) महामारीका कारण बाँकी रहेको विद्युत बक्यौता उठाउने चुनौतीसमेत घिसिङलाई रहनेछ । प्रसारण लाइनकाे समस्याले निजी क्षेत्रका जलविद्युतगृहले उत्पादन गरेकाे विद्युत खेर गइरहेकाे छ ।

गाउँ सहर संवाददाता

तपाईँको मत