राजनीति

ठाकुर जसपाको अध्यक्षबाट साधारण सदस्य, यादव पक्षका ३५ जना मात्रै कार्यकारिणी सदस्य

काठमाडौं । निर्वाचन आयोगले जनता समाजवादी पार्टीको नयाँ कार्यकारिणी समितिलाई अद्यावधिक गर्दै महन्थ ठाकुर पक्षका १६ जनाबाहेकको केन्द्रीय कार्यकारिणी समितिको  नाम मात्र अभिलेखिकरण गरेकाे छ ।

आयोगमा जसपाको आधिकारिकता पाएको उपेन्द्र यादव अध्यक्षताको बैठकले गरेको निर्णयको माइन्युट बमोजिम कार्यकारिणी समितिको अभिलेखीकरणमा यादवको पक्षमा उभिएका ३५ जनालाई अभिलेखीकरण गरिएको हो ।

अब जसपाको अध्यक्षबाट महन्थ ठाकुर कानूनी रुपमा हटेका छन् । ठाकुर पक्षका १६ जनाबाहेकको केन्द्रीय कार्यकारिणी समिति आयोगको अभिलेखमा कायम भएपछि ठाकुर, राजेन्द्र महतो, सरतसिंह भण्डारी लगायतको हैसियत साधारण सदस्यमात्र भएको छ ।

गत साउन ११ गते जसपाको आधिकारिता विवाद मिलाउनका लागि आयोगले हेट काउन्टका लागि जसपाका ५१ जना कार्यकारिणी समिति सदस्यहरुलाई सनाखतका लागि कार्यालयमा बोलाएको थियो ।

यादवको पक्षमा ३४ र ठाकुरको पक्षमा १६ कार्यकारिणी समितिले सनाखत गरेका थिए । निलम्बित सांसद् समेत रहेका कार्यकारिणी सदस्य रेशम चौधरी तटस्थ बसेका थिए ।

गाउँ सहर संवाददाता