अर्थतन्त्र

ज्योति विकास बैंक र नेपाल महिला उद्यमी महासंघबीच सम्झौता

• गाउँ सहर संवाददाता
• २७ असार आइतबार, २०७८ | २०:५५:०० मा प्रकाशित

काठमाडाैं । ज्योति विकास बैंक र नेपाल महिला उद्यमी महासंघ (एफविन) बीच सहकार्यको लागि सम्झौता भएको छ।

एफविनमा आबद्ध व्यवसायी र त्यस्ता संस्थामा कार्यरत कर्मचारीलाई विभिन्न बैंकिङ सेवा प्रदान गराउने सम्बन्धमा दुई पक्षबीच सम्झौता भएको हो।

आइतबार एक कार्यक्रमबीच ज्योति विकास बैंकका तर्फबाट बैंकका प्रमुख कार्यकारी अधिकृत चन्द्र भट्ट र नेपाल महिला उद्यमी महासंघका तर्फबाट एफविनकी अध्यक्ष रीता सिम्हाले सम्झौतापत्रमा हस्ताक्षर गरेका हुन्।

सम्झौताअनुसार बैंकले एफविनमा आबद्ध व्यवसायी तथा त्यस्ता संस्थामा कार्यरत कर्मचारीलाई विशेष छुटमा प्रोफेसनल लोन, कर्जा सेवा र सहज वित्तीय सेवा प्रदान गर्नेछ।

साथै, ज्योति विकास बैंकले एफविन अन्तर्गतका व्यवसायीलाई डिजिटल बैंकिङ सेवा प्रदान गर्ने र सहजै सुचारु गरी व्यवसायमा लागू गर्न पनि सहयोग गर्नेछ।

व्यवसायीले डिजिटल भुक्तानीका सेवा आफ्नो व्यवसायमा भित्र्याई आफ्ना ग्राहकलाई थप सुविधा उपलब्ध गराउन सक्नेछन्।

यसका साथै बैंकले आधुनिक बैंकिङ, वित्तीय साक्षरता, उद्यमशीलता विकासका निमित्त एफविनसँगको सहकार्यमा विभिन्न कार्यक्रम सञ्चालनमा ल्याउने भएको छ।

बैंकले हाल १०५ शाखा कार्यालय, १ एक्सटेन्सन काउन्टर तथा ६२ वटा एटीएममार्फत सेवा उपलव्ध गराउँदै आएको छ।