गाउँ सहर

बीपी राजमार्ग अवरुद्ध, तीनवटा सवारी साधन पुरिए

• गाउँ सहर संवाददाता
• १९ असार शनिबार, २०७८ | १२:०४:०० मा प्रकाशित

काभ्रेपलाञ्चोक । निरन्तर वर्षापछि आएको बाढीको कारण काभ्रेको रोशी गाउँपालिका वडा नं. १२ मा पर्ने बीपी राजमार्गमा ३ वटा सवारी साधन पुरिएको छ ।

रोशी खोलामा आएको लेदो सहितको पानीले बीपी राजमार्ग समेत अवरुद्ध बनेको छ ।

बाढीका कारण बीपी राजमार्ग हुँदै पूर्वतर्फ लागेका र काठमाडौं आउँदै गरेका सवारीसाधन यत्तिखेर राजमार्गमा नै अड्किएका छन् ।

काठमाडौंतर्फ आउँदै गरेका तीनवटा स्कारपियो लेदोमा अड्किएका कारण पुरिएका जिल्ला प्रहरी प्रमुख एसपी भुपेन्द्रबहादुर खत्रीले जानकारी दिए । उक्त सवारीसाधनमा रहेका यात्रु भने सुरक्षित रहेको प्रहरीले जनाएको छ ।

रोशी गाउँपालिका अध्यक्ष दलबहादुर लामाले अवरोध हटाउन सुरु गरिए पनि निरन्तरको वर्षा र खोलाको सतह बढेको कारण तत्काल सम्भव नभएको बताए ।

त्यस्तै नमोबुद्ध–५, लास्कोटमा रहेको क्रसर उद्योगबाट आएको लेदोले पनि राजमार्गमा अवरोध गरेको छ । त्यहाँको अवरोध भने हटाइएको छ ।

वर्षाको कारण धुलिखेल–११, फस्कोटमा घर पछाडिको पर्खाल खसेर ३ घर जोखिममा परेपछि धुलिखेलस्थित कालिजंग गणका सेना र प्रहरीको टोलीले सुरक्षित स्थानमा सरिएको जिल्ला प्रहरी कार्यालय काभ्रेले जनाएको छ ।