स्वास्थ्य

रुपन्देहीमा एकैदिन ६ जना कोरोना सङ्क्रमितकाे मृत्यु

• गाउँ सहर संवाददाता
• ७ बैशाख मंगलबार, २०७८ | ०८:३१:०० मा प्रकाशित

रुपन्देही ।  कोरोना सङ्क्रमणको कारण रुपन्देहीमा सोमबार एकैदिन ६ जनाको मृत्यु भएको छ ।

स्वास्थ्य कार्यालय रुपन्देहीले दिएको जानकारीअनुसार भैरहवास्थित युसिएमस कोभिड अस्पताल युनिटमा ४ जना र बुटवलस्थित लुम्बिनी प्रादेशिक अस्पताल अन्तर्गतको कोरोना विशेष अस्पतालमा २ उपचारत सङ्क्रमितको मृत्यु भएको हो ।

मृत्यु हुनेमा २ महिला र एक पुरुष रुपन्देही जिल्लाको र ३ जना जिल्ला बाहिरका रहेको स्वास्थ्य कार्यालयले जनाएको छ ।

मृत्यु हुनेमा बुटवल उपमहानगर ८ की ६५ वर्षीय महिला र बुटवल १३ की ७९ वर्षीय महिलाको मृत्यु भएको छ । त्यसैगरी रानीगंज मोतिपुर रुपन्देहीका ३८ वर्षीय पुरुषको पनि मृत्यु भएको छ ।

उता जिल्ला बाहिरको मृत्यु हुनेमा महरागंज ९ कपिलवस्तुका ५२ वर्षीय पुरुष, झिमरुक प्युठानका ५८ वर्षीय पुरुष र स्वर्गद्वारी प्युठानका ४८ वर्षीय पुरुष रहेका छन् ।

दोस्रो लहर अन्तर्गत रुपन्देहीमा दिनहुँ संक्रमण बढ्दो छ ।  जिल्लामा रहेका दुई सरकारी कोभिड अस्पताल र १ निजी अस्पतालले कोभिडको उपचारका लागि छुट्टाइएको थियो । अहिले ती अस्पताल सबै भरिएको अवस्था छ ।  स्वास्थ्य कार्यालय रुपन्देहीका प्रमुख डा. राजेन्द्र गिरीका अनुसार शहरी क्षेत्रमा संक्रमण दर निकै बढ्दो छ । शहरी क्षेत्रका भिडभाड हुने क्षेत्रबाट सङ्क्रमितको सङ्ख्या बढी देखिएकाले र अस्पतालमा बिरामीको चाप बढेकाले सबैलाई सचेत रहन गिरीको आग्रह छ ।