अर्थतन्त्र

नाफा सुरक्षित गर्नेहरु हाबी भएपछि आज पनि ३७ अंकले घट्याे नेप्से

• गाउँ सहर संवाददाता
• ६ बैशाख सोमबार, २०७८ | १७:२०:०० मा प्रकाशित

काठमाडाैं । आइतबार ओरालो लागेको शेयरबजार दाेस्राे दिनपनि निरन्तर निरन्तर ओरालो लागेको छ ।

साेमबार नेप्से ३७.५८ अंकले झरेर २६६१.९३ विन्दुमा आइपुगेकाे छ । 

यस दिन कारोबारमा आएका २१३ कम्पनीका १ करोड ४२ लाख ७६८ कित्ता शेयर किनबेच भएर ६ अर्ब ७६ करोड ६८ लाख रुपैयाँ बराबरको कारोबार भएको छ ।

सोमबार नेप्से सूचकसंगै कारोबार रकम पनि घटेको छ । आइतबारको तुलनामा कारोबार रकम २ अर्ब ३ करोड ५० लाख रुपैयाँले घटेको हो । आइतबार ८ अर्ब ८० करोड १८ लाख रुपैयाँ बराबरको शेयर कारोबार भएको थियो ।

यसदिन ज्योति लाइफ इन्स्योरेन्स र महिला लघुवित्त वित्तीय संस्थाको शेयर सकारात्मक सर्किट लेभलमा कारोबार भएको हो ।

चन्द्रगिरी हिल्सको शेयरमूल्य भने नकारात्मक सर्किट लेभलमा कारोबार भएको छ । यस्तै सप्तकोशी डेभलपमेन्ट बैंक,आईएमई जनरल रिडी हाइड्रोपावर लगायतको शेयरमूल्य ओरालो लागेका छन् ।

कारोबार रकमका आधारमा यस दिन नागरिक लगानी कोष शीर्ष स्थानमा रहेको छ । यस दिन कोषको २८ करोड ३४ लाख ४७ हजार रुपैयाँ बराबरको शेयर खरिदबिक्री भएको छ ।

बजार ऐतिहासिक उचाईमा पुगेपछि नाफा सुरक्षित गर्नेहरु हाबी भएपछि बजार घट्न थालेका लगानीकर्ताहरूकाे भनाइ छ ।