स्वास्थ्य

नेपालमा कोरोना संक्रमण ह्वात्तै बढ्यो, ४ जनाको मृत्यु, स्कुल अझै बन्द भएनन्, यातायातमा जोरबिजोर छैन

काठमाडौँ । पछिल्लो २४ घण्टामा नेपालमा ४ जना कोरोना संक्रमितको मृत्यु भएको छ । योसहित कुल मृतकको संख्या ३ हजार ७० पुगेको छ । 

नयाँ संक्रमित ८३६ र ६४ गरी ९०० (पिसिआर र एन्टिजेन विधिबाट) जना थपिएका छन् । थपिएकासहित कुल संक्रमितको संख्या २ लाख ८२ हजार ८९० पुगेको छ ।

स्वास्थ्य तथा जनसंख्या मन्त्रालयका अनुसार पछिल्लो २४ घण्टामा स्वास्थ्य लाभ गर्नेको संख्या २०८ छ । योसहित कुल स्वास्थ्य लाभ गर्नेको संख्या २ लाख ७४ हजार ८१२ पुगेको छ । 

मन्त्रालयका अनुसार आजसम्म २३ लाख ३५ हजार ८४ जनाको पिसिआर टेस्ट भएको छ । अहिले देशभरका आइसोलेशनमा ५ हजार ८ र क्वारेन्टाइनमा रहनेको संख्या ७७ छ ।

छिमेक राष्ट्रहरुमा संक्रमण बढेसँगै मन्त्रालयले सावधानी अपनाउन आग्रह गरेको छ । सीमा नाकामा कडाईसँगै चेकजाँच समेत बढाइएको छ । पछिल्लो समय देशमा संक्रमितको दर बढ्दो छ ।

यति हुँदापनि विद्यालय र यातायात बारे सरकारले बन्द र जोरबिजोर गर्ने कुनै निर्णय गरेको छैन ।

गाउँ सहर संवाददाता