अर्थतन्त्र

यस वर्षकाे शेयरबजार ऐतिहासिक रेकर्डसहित बिदाई

• गाउँ सहर संवाददाता
• ३१ चैत मंगलबार, २०७७ | १५:४६:०० मा प्रकाशित

काठमाडाैं । यस वर्षको अन्तिम काराेबार दिन आज (मंगलबार) सेयर बजारले मापक नेप्सेले नयाँ इतिहास रचेको छ । सेयर बजारले वर्ष २०७७ लाई उत्साहपूर्ण तरिकाले बिदाइ गरेको छ । यसदिन नेप्से २३.२३ अंकले बढेर २७१४.७९ बिन्दुमा पुगेको छ । 

कोरोना महामारीका कारण लामो समय लकडाउनबाट गुग्रिएको मुलुकमा सेयर बजारले भने नयाँ इतिहास रेकर्ड कायम गर्दै २७ सयको बिन्दु पार गरेकाे छ । यो नेप्सेले कायम गरेको अहिलेसम्मकै उच्च विन्दु हो ।

मंगलबार २०९ वटा कम्पनीकाे १ करोड ४६ लाख ९१ हजार ६४३ कित्ता शेयर ७ अर्ब १४ करोड ३१ लाख ५१ हजार रुपैयाँमा खरिदबिक्री भएको छ । शेयर बजारमा रहेको लगानीकर्ताको सम्पत्ति मापक सूचक कुल बजार पूँजीकरण  ३७ खर्ब ५८ अर्ब ९७ करोड ५७ लाख रुपैयाँ कायम भएको छ ।

आजको दिन सबैभन्दा बढी कमाउने शीर्ष कम्पनीमा एनआइसी एशिया लघुवित्त, माउन्टेन इनर्जी, ज्योति लाइफ इन्स्योरेन्स, सिन्धु विकास बैंक र छ्याङदी हाइड्रोपावर कम्पनी छन् ।

त्यसैगरी सबैभन्दा बढी गुमाउने कम्पनीमा लक्ष्मी लघुवित्त, ग्लोवल आइएमई लघुवित्त, एनआरएन इन्फ्रास्ट्रक्चर एन्ड डेभलपमेन्ट, इन्फिनिटी लघुवित्त र श्री इन्भेष्टमेन्ट फाइनान्स छन् ।

मंगलबार नबिल बैंकको सबैभन्दा धेरै २८ करोड ६२ लाख रुपैयाँको शेयर कारोबार भएको छ । 

दिन १०६ वटा कम्पनीको सेयर मूल्य बढ्दा ८९ कम्पनीको सेयर मूल्य घटेको छ । त्यसैगरी १४ वटा कम्पनीको सेयर मूल्य स्थिर छ ।