खेल

कतारमा विमल घर्ति मगरको खुट्टाकाे सफल अपरेशन

• गाउँ सहर संवाददाता
• २५ फाल्गुण मंगलबार, २०७७ | १९:३२:०० मा प्रकाशित

काठमाडौं । राष्ट्रिय फुटबल टिमका फरवार्ड विमल घर्ति मगरको खुट्टाको चोटको सफल शल्यक्रिया गरिएको छ ।

कतारस्थित अस्पेटार अस्पतालमा मंगलबार विमलको सफल शल्यक्रिया भएको हो ।

घुँडाको गम्भीर चोट बोकेपछि उपचारका लागि विमल कतार गएका थिए ।

अखिल नेपाल फुटबल संघ (एन्फा) को पहलमा कतार फुटबल एसोसियसनको सहयोगमा विमलको कतारमा शल्यक्रिया गरिएको हो ।

राष्ट्रिय टिमको प्रशिक्षण दौरान विमलले चोट बोकेका थिए । उनको दायाँ घुँडाको लिगामेन्ट च्यातिएको थियो ।

यस अघि राष्ट्रिय टोलीका मिडफिल्डर बिक्रम लामाको सफल शल्यक्रिया भईसकेको छ ।

कोरोना र अन्य विरामीको चापको कारणले विमलको शल्यक्रियामा ढिलाई भएको हो ।