गाउँ सहर

श्रम संस्कृति पार्टीद्वारा बुढानीलकण्ठमा वृक्षारोपण

• गाउँ सहर संवाददाता
• ३० श्रावण शनिबार, २०८३ | १६:४०:०० मा प्रकाशित

काठमाडौं । श्रम संस्कृति पार्टीको काठमाडौं संयोजक समितिले शनिबार काठमाडौंको बुढानीलकण्ठमा वृक्षारोपण गरेको छ। वृक्षारोपण कार्यक्रममा पार्टीका नेता तथा कार्यकर्ताको उल्लेख्य सहभागिता रहेको थियो।

श्रम संस्कृति पार्टीको बागमती प्रदेश उपाध्यक्ष तथा रामेछाप संयोजक श्यामलाल योञ्जनका अनुसार कार्यक्रममा पार्टी अध्यक्ष हर्क साम्पाङसहित नेता तथा कार्यकर्ताहरूको बाक्लो उपस्थिति रहेको थियो। रामेछाप–काठमाडौं सम्पर्क समितिमार्फत पनि दर्जनौँको सहभागिता रहेको थियो।

शनिबारलाई ‘श्रमबार’का रूपमा मनाउँदै पार्टीले विदाको दिनको केही समय श्रमदानमा सदुपयोग गर्दै समाजलाई केही योगदान दिने नीति लिएको योञ्जनले बताए। श्रमदानलाई केवल कार्यक्रमका रूपमा सीमित नराखी संस्कृतिका रूपमा विस्तार गर्दै लैजाने पार्टीको नीति रहेको उनले उल्लेख गरे।

उनका अनुसार श्रम संस्कृति पार्टीले हरेक शनिबार सामाजिक काम तथा श्रमदानका गतिविधिलाई निरन्तरता दिँदै आएको छ।