शिक्षा

विभिन्न आठ विश्वविद्यालयमा रिक्त रहेको उपकुलपति पदका लागि दरखास्त आह्वान

• गाउँ सहर संवाददाता
• २५ बैशाख शुक्रबार, २०८३ | ०९:१२:०० मा प्रकाशित

काठमाडाैँ । विभिन्न आठ विश्वविद्यालयमा रिक्त रहेको उपकुलपति पदका लागि दरखास्त आह्वान गरिएको छ ।

त्रिभुवन विश्वविद्यालय, पूर्वाञ्चल विश्वविद्यालय, पोखरा विश्वविद्यालय, लुम्बिनी बौद्ध विश्वविद्यालय, कृषि तथा वन विज्ञान विश्वविद्यालय, मध्यपश्चिम विश्वविद्यालय, सुदूरपश्चिम विश्वविद्यालय र राजर्षि जनक विश्वविद्यालयको उपकुलपति नियुक्तिका लागि नाम सिफारिस गर्न गठित छनोट तथा सिफारिस समितिले आवेदन खुला गरेको हो ।

समितिले मिति बिहीबार स्वीकृत गरेको ‘विभिन्न विश्वविद्यालयको उपकुलपति छनोट तथा सिफारिस सम्बन्धी एकीकृत कार्यविधि, २०८३’ बमोजिम इच्छुक तथा योग्य व्यक्तिबाट दरखास्त आह्वान गरिएको जनाएको छ ।

सूचनाअनुसार आवेदन दिन इच्छुक व्यक्तिले सूचना पहिलो पटक प्रकाशित भएको मितिले १० दिनभित्र शिक्षा, विज्ञान तथा प्रविधि मन्त्रालयको वेबसाइटमार्फत अनलाइन दरखास्त दिन सक्नेछन् ।

मन्त्रालयले उपकुलपति छनोट तथा सिफारिस सम्बन्धी एकीकृत कार्यविधिसमेत आफ्नो वेबसाइटमा सार्वजनिक गरेको जनाएको छ ।