प्रविधि

चित्लाङमा नेपाल टेलिकमको एनटी फाइबर सेवा विस्तार

• गाउँ सहर संवाददाता
• १९ कार्तिक बुधबार, २०८२ | १७:४१:०० मा प्रकाशित

काठमाडौँ । नेपाल टेलिकमले मकवानपुरको पर्यटकीय क्षेत्र चित्लाङमा एनटी फाइबर (एफटीटीएच) सेवा विस्तार गरेको छ ।

थाहा नगरपालिका-९ स्थित स्वच्छन्द भैरव माध्यमिक विद्यालयमा १८ कात्तिकदेखि टेलिफोन र इन्टरनेट सेवासहितको एफटीटीएच सेवा सञ्चालन गरेसँगै उक्त क्षेत्रमा आधारभूत दूरसञ्चार सेवाको सुरुवात भएको टेलिकमले जनाएको छ ।

निरन्तर बढ्दो मागका कारण केही विद्यालय र अन्य संस्थाहरूमा पनि एफटीटीएच जडानको प्रक्रिया अगाडि बढेको कम्पनीको भनाइ छ ।

हाल रेडियो ब्याकहल (Radio Backhaul) मार्फत सेवा दिइएको भए पनि ग्राहकको बढ्दो आवश्यकता अनुसार निकट भविष्यमा फाइबर ब्याकहलमार्फत टेलिफोन, इन्टरनेट र टेलिभिजन सेवासमेत विस्तार गर्ने योजना रहेको टेलिकमले जानकारी दिएको छ ।