गाउँ सहर

२ लाख २१ हजार दर्शनार्थीले गरे पाथीभराको दर्शन

• गाउँ सहर संवाददाता
• ३१ चैत आइतबार, २०८१ | १९:५३:०० मा प्रकाशित

काठमाडाैँ । २०८१ सालको बैशाख देखि चैत महिनासम्ममा ताप्लेजुङस्थित पाथीभरा मन्दिरमा २ लाख २१ हजार ६ सय २ जनाले मन्दिरको दर्शन गरेका छन् । पाथीभरा क्षेत्र विकास समितिमा कार्यकारी निर्देशक प्रजिन हाङवाङका अनुसार चैत महिनामा मात्र ४० हजार ४ सय ४५ जनाले मन्दिरको दर्शन गरेका छन् ।

गत वैशाखदेखि चैत महिनासम्ममा कुल ३ करोड ५ लाख ५६ हजार १२ रुपैयाँ भेटी संकलन भएको छ । चैत महिनामा ५० लाख ५ सय रुपैयाँ भेटि गणना भएको क्षेत्र विकास समितिले जनाएको छ ।

चालु आव गत साउनदेखि चैत मसान्तसम्ममा १ लाख ५८ हजार ७ सय ३५ जनाले मन्दिरको दर्शन गरेका छन् । चालु आवको साउनदेखि चैत मसान्त सम्ममा २ करोड ३ लाख ६८ हजार ७ सय ५६ रुपैयाँ भेटि संकलन भएको समेत क्षेत्र विकास समितिले जनाएको छ ।