गाउँ सहर

२० औं लेखनाथ महोत्सवको आकर्षण बन्दै बुद्धको प्रतिमा

• गाउँ सहर संवाददाता
• २२ पौष सोमबार, २०८१ | १९:२९:०० मा प्रकाशित

पोखरा । कास्कीको लेखनाथमा जारी  २० औं लेखनाथ महोत्सवमा बुद्धको प्रतिमा दर्शक आकर्षणकाे माध्यम बनेको छ । महोत्सव लेखनाथको संस्कृति, स्थानीय उत्पादन विकास र सम्मृद्धि’ भन्ने नाराका साथ पोखरा २७ को तालचोकमा सञ्चालित २०औँ लेखनाथ महोत्सवमा राखिएको बुद्धको प्रतिमा हेर्न कै लागि दर्शक ओइरिन थालेपछि आकर्षणको केन्द्र बनेको हो ।

विगतमा अठारौं महोत्सवमा वेगनासतालकाे डेमाे तथा उन्नाइसौंमा कवि शिरोमणि लेखनाथ पौडेलको थ्री डी आर्ट प्रतिमा बनाई चर्चा कमाएका प्रतिमाका परिकल्पनाकार विश्वगोपाल श्रेष्ठले यस पटकपटकको महाेत्सवमा  केही न केही नयाँ प्रयोगको माध्यमबाट दर्शकको ध्यान तान्न यो प्रतिमा बनाउन लगाएका हुन् ।

उनका अनुसार विश्व शान्तिको कामनाका साथ महोत्सव परिसरमा भगवान गौतम बुद्धको आकर्षक प्रतिमा स्थापना गरिएकाे हो ।

महोत्सवमा स्थापना गरिएको प्रतिमाले बालकदेखि वृद्धसम्मकाे ध्यान खिच्न सफल भएको छ । प्रतिमासँगै फोटो खिचाउनेदेखि टिकटिक बनाउनेसम्मको भीड  नै लाग्ने गरेको छ ।

 बुद्धको प्रतिमाले महोत्सवमा दर्शकको ध्यान तान्ने मात्रै हैन धार्मिक सहिष्णुता र विश्व शान्तिको सन्देश पनि प्रवाह गरेको आयाेजकहरु बताउँछन् ।

उक्त प्रतिमा निर्माणमा तीन लाख ५० हजार रुपैयाँ खर्च भएको उनले बताए । स्वदेशमा नै निर्माण भएको प्रतिमा महोत्सव समाप्त भएपछि उपयुक्त ठाउँको खोजी गरेर व्यवस्थापन  गरिने जनाइको छ जसले लेखनाथ क्षेत्रको धार्मिक पर्यटन प्रवर्द्धनमा समेत टेवा पुग्ने उनको दावी छ ।  

यसैगरी  यसपालिको लेखनाथ  महाेत्सवमा बनाइएको  माछाकाे अक्वेरियमले पनि दर्शककाे ध्यान तानेको पाइन्छ । यसपटक महिलाको हक, अधिकारसग सम्बन्धित रहेर आयाेजित  महिला हाजिरी जवाफ पनि दर्शकको राेजाइमा रहेको छ । हिमाली भेकमन पाइने याकलाई अर्को आकर्षण बनाइएको छ भने युवालाई लक्षित गरि कन्सर्ट तथा लाेक तथा दाेहाेरी गीतका पारखीहरुका लागि लाेकदाेहाेरीका कलाकारहरु ल्याइएका वरिष्ठ उपाध्यक्ष राजेन्द्र ओझा बताउँछन् ।

महाेत्सवमा नाै करोड काराेबारकाे अपेक्षा रहेको बताइन्छ । आगामी माघ १ गतेसम्म महोत्सव चल्नेछ ।