गाउँ सहर

बिरामी बोकेको हेलिकोप्टर खेतमा अवतरण गरेपछि...

• गाउँ सहर संवाददाता
• १६ श्रावण बुधबार, २०८१ | १५:५६:०० मा प्रकाशित

सुर्खेत । बिरामी बोकेर डोल्पाबाट नेपालगन्जका लागि उडेको नेपाली सेनाको हेलिकोप्टरलाई सुर्खेतमा आकस्मिक अवतरण गराइएको छ।

लेक लागेर बिरामी भएका सशस्त्र प्रहरीका असई नरबहादुर बीसीलाई डोल्पाबाट उपचारका लागि नेपालगन्ज लगिंदै थियो। मौसम खराब भएपछि लेकबेसी नगरपालिका-६ मा आकस्मिक अवतरण गरिएको जिल्ला प्रहरी कार्यालय, सुर्खेतका प्रहरी नायब उपरीक्षक वीरेन्द्रवीर विश्वकर्माले बताए।

सैनिक हेलिकोप्टरलाई साढे १२ बजेतिर खेतमा अवतरण गराइएको हो। मौसममा केही सुधार भएपछि अहिले हेलिकोप्टरलाई सुर्खेत विमानस्थल ल्याइएको डीएसपी विश्वकर्माले बताए।

बिरामी असई बीसीलाई उपचारका लागि एम्बुलेन्स मार्फत प्रदेश अस्पताल, कालागाउँ लगिएको छ। उनको अस्पतालमा उपचार भइरहेको प्रहरीले जनाएको छ।