राजनीति

ओली, देउवाप्रति संसदमा रूष्ट प्रधानमन्त्री प्रचण्ड

• गाउँ सहर संवाददाता
• ६ असार बिहीबार, २०८१ | १७:१४:०० मा प्रकाशित

काठमाडौं । प्रतिनिधिसभाको बैठकमा आफ्नो सम्बोधन रहेको बेला सत्ता र प्रतिपक्षका शीर्ष नेताहरू अनुपस्थित रहेकोप्रति प्रधानमन्त्री पुष्पकमल दाहालले असन्तुष्टि व्यक्त गरेका छन् । प्रधानमन्त्रीले संसद्मा सम्बोधन गर्ने दिन सांसद रहेका शीर्ष नेताहरू उपस्थित रहने अभ्यास तोडिएकोप्रति दाहालले असन्तुष्टि जनाएका हुन् । 

प्रतिनिधिसभाको बिहीबारको बैठकमा प्रधानमन्त्री दाहालले आफ्नो भारत भ्रमण, राष्ट्रपतिको स्विट्जरल्यान्ड र जर्मनी भ्रमणसँगै सांसदहरूका प्रश्नको जवाफ दिने कार्यक्रम थियो । प्रधानमन्त्रीले भ्रमणबारे जानकारी गराइ सांसदहरूका प्रश्नको जवाफ दिएपछि शीर्ष नेताहरूको अनुपस्थितिमा असन्तुष्टि जनाएका हुन् ।

प्रधानमन्त्रीले सदनको परम्परा तोडिएको विषयमा असन्तुष्टि जनाएका हुन् । 'हाम्रो सदनको परम्परा, प्रचलन, गरिमा जे भनेपनि प्रधानमन्त्रीले बोल्ने दिन सत्तापक्ष पनि, प्रतिपक्षका पनि सबै नेताहरू, सबै माननीय सदस्यहरू मन्त्रीहरू इमर्जेन्सीबाहेक सबै उपस्थित हुने प्रचलन नेपालको इतिहासमा स्थापित थियो । तर अब क्रमशः त्यो पातलिन थाल्या छ । यसले हामीले अमूक प्रधानमन्त्रीलाई अवमूल्यन गरेको पक्कै होइन होला । यो प्रक्रिया जारी रह्यो भने हामी आफैंले आफैंलाई अवमूल्यन गरेको ठहरिन्छ,' उनले भने ।

प्रतिनिधिसभाको बिहीबारको बैठकमा सत्तापक्षको प्रमुख दल एमालेका अध्यक्ष केपी शर्मा ओली अनुपस्थित थिए । प्रमुख प्रतिपक्षी दलका नेता शेरबहादुर देउवा प्रधानमन्त्रीले सम्बोधन गर्न जाने बेलामा कुर्सीमा थिए । प्रधानमन्त्री बोलिरहेकै बेला उनी पनि संसद् बैठकबाट बाहिरिएका थिए । ओली र देउवा पूर्वप्रधानमन्त्री हुन् ।

त्यस्तै, पूर्वप्रधानमन्त्री माधवकुमार नेपाल पनि प्रतिनिधिसभा बैठकमा अनुपस्थित थिए । उपप्रधानमन्त्रीहरू रघुवीर महासेठ र नारायणकाजी श्रेष्ठलगायत मन्त्रीहरू पनि अनुपस्थित रहेका थिए ।

प्रतिपक्षी दलका नेताहरू राजेन्द्र लिङ्देन, महन्थ ठाकुर र उपेन्द्र यादवलगायतका नेताहरू पनि प्रतिनिधिसभा बैठकमा अनुपस्थित थिए ।