गाउँ सहर

भाखा नाघेका कर्जामा एनआईसी एशिया बैंकले छुट दिने

• गाउँ सहर संवाददाता
• १६ जेठ बुधबार, २०८१ | १३:२०:०० मा प्रकाशित

काठमाडौं । एनआईसी एशिया बैंकले भाखा नाघेका कर्जामा छुट दिने घोषणा गरेको छ । देशमा हाल कायम रहेको आर्थिक शिथिलताका कारण बैंकको कर्जा ग्राहकहरुमा परेको असरलाई न्यूनीकरण गर्न सघाउ पुर्याउने भन्दै यस्तो छुट दिने बताएका हो । 

गत चैत्र मसान्तसम्ममा देहाय बमोजिमले भाखा नाघेका कर्जाहरुको हकमा सम्वन्धित ऋणीले सम्पूर्ण कर्जा रकम यहि जेठ महिना भित्रमा चुक्ता भुक्तान गरेमा जरिवाना तथा हर्जाना रकममा शत प्रतिशत छुट दिने भएको छ । बैंकले साधारण वक्यौता ब्याज रकममा समेत छुट प्रदान गर्ने योजना ल्याएको छ ।

९१ दिनदेखि १८० दिनको १५ प्रतिशत छुट, १८१ दिनदेखि ३६५ दिनको २५ प्रतिशत छुट र ३६५ दिनभन्दा बढि भाखा नाघेको छ भने ३५ प्रतिशत छुट दिने बैंकले जनाएको छ । बैंकले ल्याएको यस छुट योजनाबाट आर्थिक शिथिलताले समस्यामा परेका ग्राहकहरुको वित्तीय भार कम गर्न मद्दत पुग्ने बैंकको विश्वास छ ।