दिगोविकास

आन्दोलनको तयारीमा जुट्दै राप्रपा

• गाउँ सहर संवाददाता
• १५ फाल्गुण मंगलबार, २०८० | १२:१५:०० मा प्रकाशित

काठमाडाैं । निर्णायक आन्दोलनको घोषणा गरेको राप्रपाले आफ्नो कामलाई तिव्रता दिएको छ ।

चैतको दोस्रो हप्ताबाट राजधानी केन्द्रित आन्दोलनको घोषणा गरेको राप्रपाले त्यसलाई बलियो ढंगले सम्पन्न गर्न फागुन १६ गते प्रशिक्षक प्रशिक्षण कार्यक्रम तय गरेको छ ।   

आन्दोलन परिचालन समितिले आयोजना गरेको प्रशिक्षण कार्यक्रममा देशभरिबाट १०१ जना सहभागी रहने छन् । राप्रपाले आन्दोलन परिचालन समितिको संयोजकमा पार्टीका महामन्त्री माननीय डा. धवल शमशेर राणालाई तोकेको छ । प्रशिक्षणमा पार्टीको सैद्धान्तिक पक्षबारे पूर्व अध्यक्ष डा.प्रकाशचन्द्र लोहनी, आन्दोलनको आवश्यकताबारे उपाध्यक्ष रविन्द्र मिश्र र आन्दोलनको सम्पूर्ण प्राविधिक पक्षबारे महामन्त्री डा.धवल शमशेर राणाले प्रशिक्षार्थीहरुलाइ प्रशिक्षण गराउने आन्दोलन परिचालन समितिका सदस्य जनकराज पाठकले बनाए ।

पाठकले भने- 'यहाँ हुन लागेको प्रशिक्षण कार्यक्रम भनेको यो आन्दोलन केन्द्रित मात्रै हो । यहाँको प्रशिक्षण सकिएलगतै २३ गतेभित्र सबै जिल्लामा र २८ गतेभित्र वडा तहसम्म प्रशिक्षणको कार्यक्रम चल्नेछ । यो लगत्तै आन्दोलनको विभिन्न कार्यक्रमहरु सार्वजनिक गरिने छ । जिल्ला तहलेखि क्षेत्रीय तहसम्म र सहर केन्द्रीत आन्दोलनका रुपहरु हुनेछन् । चैत १५ पछाडि काठमाडौं प्रवेश गर्ने र वारपारको आन्दोलन गर्नेछौँ ।'

 

राप्रपाले हिन्दु अधिराज्य, राजसंस्था र प्रदेश खारेज लगायतका ४० बूँदे मागहरु प्रधानमन्त्रीलाई फागुन ९ गते बुझाएको थियो ।