गाउँ सहर

काठमाडौंको गैह्रीगाउँमा ४ जनाको हत्या, ३ जना एकै परिवारका

• गाउँ सहर संवाददाता
• ३० भदौ शनिबार, २०८० | ०८:५२:०० मा प्रकाशित

काठमाडौं । काठमाडौं महानगरपालिका-३२ तीनकुनेस्थित गैह्रीगाउँमा गए राति एकै परिवारका तीन जनासहित चार जनाको हत्या भएको छ। 

हत्या भएका तीन जना एकै परिवारका रहेको काठमाडौं उपत्यका प्रहरी कार्यालयका प्रवक्ता, प्रहरी वरिष्ठ उपरीक्षक दिनेशराज मैनालीले जानकारी दिए।

उनका अनुसार तीनकुनेस्थित दिव्य सःमिल भित्र काठले बनेको एक तले जस्ताको टहरोमा धारिलो हतियार प्रहार भएको अवस्थामा दुई पुरुष र दुई महिलाको शव फेला परेको हो।

उपत्यका प्रहरी कार्यालयका प्रमुख दीपक थापाका अनुसार यस घटनाको बारेमा बेलुका साढे ११ बजे प्रहरीले खबर पाएको थियो। प्रहरी घटनास्थल पुग्दा आलै रगत थियो।  

‘बेलुका ११ बजे आसपास घटना भएको आंशका गरेका छौं। एकै परिवारका तीन जनाको हत्या भएको देखियो,’ उनले भने, तीनै जना स: मिलमा कुरुवा बसेका हुन् भने अर्को एक जना काम गर्न बसेका हुन्।’

उनका अनुसार प्रहरीले एक जनालाई नियन्त्रणमा लिएको छ। नियन्त्रणमा लिएको सोही मिलकै कामदार हुन्।

हत्या भएकामा दोलखा घर भई हाल सोही काष्ठ मिलमा गेटपालेको काम गर्ने वर्ष अन्दाजी ५६ का कुमार भुजेल, उनकी श्रीमती वर्ष अन्दाजी ५२ की अम्बिका भुजेल, कुमारकी आमा वर्ष ७६ की शुभद्रा भुजेल र मोरङ बेलबारी स्थायी घर भएका अन्दाजी २० वर्षका नविन राई रहेका छन्। 

उक्त दिव्य सःमिल दोलखा, कालीञ्चोक गाउँपालिका ८ घर भई गौशाला बस्ने, बालकृष्ण शिवाकोटीले सञ्चालन गरेको बुझिन आएको छ । अहिले मुचुल्कालगायतको कार्य सम्पन्न गरी शव परीक्षणको लागि महाराजगञ्जस्थित शिक्षण अस्पताल पठाइएको मैनालीले जानकारी दिए। 

घटनाको अनुसन्धानका क्रममा सोही घरमा बस्ने २८ वर्षीय दीपेन्द्र राईलाई नियन्त्रणमा लिइएको काठमाडौँ उपत्यका प्रहरी कार्यालयका प्रमुख, प्रहरी अतिरिक्त महानिरीक्षक दीपक थापाले जानकारी दिए ।