खेल

मलेसियाविरुद्ध टी–२० अन्तर्राष्ट्रिय सिरिजको दोस्रो खेलमा नेपालको सानदार जित

• गाउँ सहर संवाददाता
• १६ जेठ मंगलबार, २०८० | १७:३०:०० मा प्रकाशित

काठमाडौं । मलेसियाविरुद्ध पाँच खेलको टी–२० अन्तर्राष्ट्रिय सिरिजको दोस्रो खेलमा नेपालले सानदार जित निकालेको छ ।

मंगलबार भएको खेलमा नेपालले मलेसियालाई सात विकेटले हरायो । जितसँगै नेपालले सिरिजमा १-१ को बराबरी गरेको छ । नेपाल सोमबार भएको पहिलो खेलमा मलेसियासँग पाँच विकेटले पराजित भएको थियो । 

मलेसियाले दिएको ९७ रनको विजयी लक्ष्य नेपालले १७.३ ओभरमा तीन विकेटको क्षतिमा पूरा गरेको हो । नेपालको जितमा कप्तान रुविना क्षेत्रीले अविजित २९ रन बनाइन् ।

यस्तै कविता कुँवरले २६, सीता रानामगरले २३, विन्दु रावलले १७ रन र सम्झना खड्काले अविजित दुई रन जोडिन् । बलिङमा मलेसियाकी ऐश्या एलिसा, निक नुर र विनीफ्रन्ड आनीले एक एक विकेट लिए । 

यसअघि टस जितेर पहिला ब्याटिङ गरेको मलेसियाले निर्धारित २० ओभरमा पाँच विकेटको क्षतिमा ९६ रन बनाएको थियो ।मलेसियाको लागि मास एलिसा यासमिन जुक्किफीले सर्वाधिक २८ रन बनाइन् । उनीफ्राई दुरासिंघम र वान जुलियाले २०/२० र हामिजाह हाशिमले अविजित १४ रन बनाइन् । 

बलिङमा नेपालकी कप्तान रुविना क्षेत्रीले दुई विकेट लिइन् ।  इन्दु बर्मा र कविता कुँवरले एक एक विकेट झारिन् । नेपालले अब मलेसियासँग, तेस्रो खेल जेठ १८, चौथो खेल जेठ २० र पाँचौँ खेल जेठ २१ गते खेल्नेछ ।