खेल

पानीले नेपाल र युएईबीचको खेल फेरि रोकियो, छाता ओतमा खेलको प्रतीक्षामा दर्शक

• गाउँ सहर संवाददाता
• १८ बैशाख सोमबार, २०८० | १२:२४:०० मा प्रकाशित

काठमाडौं । एसीसी प्रिमियर कप क्रिकेटको फाइनल खेल पानीले पुनः रोकिएको छ । नेपाल र युएईबीच भइरहेको खेलमा सोमबार बिहान दोस्रोपटक पानी परेपछि रोकिएको हो । 

त्रिवि क्रिकेट मैदान कीर्तिपुरमा नेपाल र युएईबीचको फाइनल खेल हेर्नका लागि दर्शकहरू व्यग्र बनेका छन् । अहिले दोस्रो पटक पानीका कारण खेल रोकिएको छ । यस्तोमा छाता ओढेर कुरिरहेका दर्शकहरू खेल कतिबेला सुरू हुने हो भनेर चिन्तित बनेका हुन् । पानी परेपछि पिचलाई त्रिपालले छोपिएको छ । पानी रोकिने र खेल सुरु हुने आशामा खेल हेर्न पुगेका दर्शक छाता ओढेर प्रतिक्षारत छन् ।

आज बिहान १० बजेर २५ मिनेटमा त्रिवि क्रिकेट मैदानमा पानी परेपछि केहीबेर खेल रोकिएको थियो । पानी पर्न रोकिएपछि खेल पुनः सुरु भएको थियो । ११ बजेर ४८ मा फेरि पानी परेपछि खेल रोकिएको छ । नेपालले टस जितेर बलिङ गरिरहेको छ । युएईले २७.३ ओभरमा ९ विकेट गुमाउँदै १०६ रन बनाएको छ ।

जल तथा मौसम पूर्वानुमान महाशाखाको अनुसार सोमबार र मंगलबार नै हावाहुरीसहित वर्षा हुने सम्भावना ८० प्रतिशतभन्दा बढी हुने मौसम पूर्वानुमान छ ।