गाउँ सहर

विदेशकाे लागि छाेराछाेरी पाइरहेका त छैनाैँ ? अवस्था भयावह !

[३.६८ गुणाले वृद्धि भएर ६ लाख २८  हजार भन्दामाथि पुगे]

• गाउँ सहर संवाददाता
• ३२ असार शनिबार, २०७९ | ११:०६:०० मा प्रकाशित

काठमाडाैँ । पछिल्लाे देशकाे वैदेशिक रोजगार तथ्यांक हेर्ने हाे भने अत्यासलाग्दाे मात्र छैन, थप चिन्ता थपिदिएकाे छ । यसअर्थमा कि हामी छाेराछाेरी विदेशकाे लागि त पाइरहेका छैनाैँ ? भन्ने अवस्था छ । वैदेशिक विभागले आर्थिक वर्ष २०७८/०७९ मा विदेश जाने श्रमिकको संख्या ३.६८ गुणाले वृद्धि भएको बताएसँगै हाम्रा मनहरूमा ढ्याँग्राे बज्न थालेकाे छ ।

शुक्रबार विभागमा वैदेशिक रोजगार विभागको आर्थिक वर्ष २०७८/०७९ वार्षिक समीक्षा तथा छलफल कार्यक्रममा बोल्दै महानिर्देशक शेषनारायण पौडेलले विदेश जानेकाे संख्यामा साे वृद्धि देखिएकाे बताएका हुन् ।

पाैडेलले चालु आर्थिक वर्षमा विदेश जाने श्रमिकको संख्या ३.६८ गुणाले वृद्धि भएर ६ लाख २८  हजार भन्दामाथि पुगेको बताए । उनले चालू आर्थिक वर्षमा अहिलेसम्मकै धेरै श्रम स्वीकृति दिइएको बताए । अहिले पनि अन्तर्राष्ट्रिय मुलुकमा वैदेशिक रोजगारी कोभिड भन्दा अगाडिको लयमा नआइसकेको भएपनि नेपालको वैदेशिक रोजगारको अवस्था पूर्ण रुपमा लयमा फर्किएको उनले बताए ।

विभागले २०५१ सालदेखि नेपालमा श्रम स्वीकृत जारी गरेर यो वर्षसम्म ७१ लाख २० हजार भन्दा बढी श्रम स्वीकृत भएको बताएकाे छ । उसले ७१ लाख श्रम स्वीकृतमा ६७ लाख पुरुष र ३ लाख महिलालाई श्रम स्वीकृत दिएको बताएकाे छ । महानिर्देशक पौडेलले चालु आर्थिक वर्षमा मात्रै गत आर्थिक वर्षको भन्दा ४ लाख ६१ हजार बढी रहेको बताए ।

महानिर्देशक पौडेलले नेपालको वैदेशिक दश गन्तव्य मुलुकमा सबैभन्दा पहिलो साउदी अरेबिया रहेको बताए । उनले साउदी अरेबियामा एक लाख ८० हजार भन्दा बढी श्रमिक गएको बताए । पौडेलले दोस्रोमा कतार,तेस्रोमा युएई र कुवेत, मलेसिया, बहराइन, रोमानिया, ओमान, जापान र क्रोएशिया रहेको उल्लेख गरे । उनले पछिल्लो समय पुनः मलेसियाको जाने श्रमिकको सख्या बढ्न थालेको बताएका छन् ।

विभागले याे कुरा बताइरहँदा नेपालीकाे घरमा युवाकाे अभाव देखिँदै गएकाे स्पष्ट हुन्छ । रैपनि हामी साे बाटाे राेक्ने भन्दापनि झनै अत्याएर धपाइहाल्ने गलत रणनीतिमा अग्रसर हुनुले भाेलिकाे अवस्था झनै कस्ताे हाेला ? अनुमान गराैँ त !