राजनीति

स्थानीय तहको निर्वाचनका लागि देशभर ३७ हजार उम्मेदवारी दर्ता

• गाउँ सहर संवाददाता
• १२ बैशाख सोमबार, २०७९ | १७:१२:०० मा प्रकाशित

काठमाडाैं । स्थानीय तहको निर्वाचनका लागि आइतबार र सोमबार भएको उम्मेदवार मनोनयनको क्रममा सोमबार अपराह्न ४ बजेसम्म  ३७ हजार ५८५ जनाको उम्मेदवारी परेको निर्वाचन आयोगले जानकारी दिएकाे छ ।

निर्वाचन आयोगका अनुसार महानगरपालिका–उपमहानगरपालिका र नगरपालिकाका प्रमुख पदमा एक हजार ३९५ र उपप्रमुख पदमा ७८४ उम्मेदवारी परेको छ ।

गाउँपालिकाको अध्यक्षको पदमा एक हजार ३२६, उपाध्यक्ष पदमा ८२२ र वडाअध्यक्ष पदमा नौ हजार ७९७ जनाको उम्मेदवारी परेको छ । त्यस्तै, महिला सदस्य पदमा पाँच हजार ८४९, दलित महिला सदस्यमा पाँच हजार ९५ र सदस्यमा १२ हजार ५१७ जनाको उम्मेदवारी परेको आयोगले जनाएको छ ।

यसअघि ३ बजेसम्म २८ हजार ८०५ जनाको उम्मेदवारी परेको छ । निर्वाचन आयोगका अनुसार प्रमुख पदमा एक हजार १७० र उपप्रमुख पदमा ६३१ उम्मेदवारी परेको छ ।

त्यस्तै, गाउँपालिकाको अध्यक्षको पदमा एक हजार ५०, उपाध्यक्ष पदमा ६०६ र वडाअध्यक्ष पदमा सात हजार ६६२ जनाले मनोनयन दर्ता गराएका छन् ।

यसैगरी, महिला सदस्य पदमा चार हजार ४३१, दलित महिला सदस्य पदमा तीन हजार ७७६ र सदस्य पदमा नौ हजार ४७९ जनाले उम्मेवादरी दर्ता गराएको आयोगले जनाएको छ ।