राजनीति

अझै सुरु भएन ११ बजे बाेलाइएकाे सत्ता गठबन्धनकाे बैठक

• गाउँ सहर संवाददाता
• ७ बैशाख बुधबार, २०७९ | १२:५०:०० मा प्रकाशित

काठमाडाैं । सत्ता गठबन्धनले बुधबार ११ बजे बस्ने भनिएको बैठक अझै सुरु हुन सकेको छैन । गठबन्धनले महानगर र उपमहानगरको भागबण्डालाई अन्तिम रुप दिन बुधबार ११ बजे बस्ने भनिएको बैठक अझै सुरु भएकाे छैन ।  बैठकमा सहभागी हुन गठबन्धनका दोस्रो तहका नेताहरु समयमै बालुवाटार पुगे पनि शीर्ष नेताहरु नपुग्दा बैठक सुरु हुन नसकेको हो । 

माओवादी केन्द्रका नेता देव गुरुङले दोस्रो तहका नेता बालुवाटार पुगे पनि बैठक सुरु नभएको जानकारी दिए । सत्ता गठबन्धनबीच महानगरको भागबण्डा लगभग टुङ्गिए पनि उपमहानगरमा कुरा मिलिसकेको छैन । जनकपुर उपमहानगर र नेपालगञ्ज उपमहानगरमा काँग्रेस र जनता समाजवादी पार्टी (जसपा) ले दावी नछोड्दा सहमति जुट्न ढिलाई भएको नेताहरुको भनाइ छ ।

सात महानगरमध्ये नेपाली काँग्रेसले तीन तथा माओवादी समाजवादी र जसपाले एकएक महानगरको नेतृत्व गर्न सहमति जुटेको बुझिएको छ । तर ११ उपमहानगरमा भने नौ वटामा सहमति जुटेपनि २ वटामा सहमति नहुँदा गठबन्धनको भागबण्डा जटिल बन्दै गएको छ ।