गाउँ सहर

यी २० देशका लागि प्रस्तावित राजदूतविरूद्ध सूचना तथा उजुरी दिन सकिने

• गाउँ सहर संवाददाता
• ४ बैशाख आइतबार, २०७९ | ०८:०८:०० मा प्रकाशित

काठमाडाैं । संसदीय सुनुवाइ समितिले विभिन्न देशका लागि राजदूतमा सिफारिस व्यक्तिहरुमाथि उजुरी आह्वान गरेको छ । समितिले एक सूचना जारी गर्दै प्रस्तावित २० राजदूतमाथि उजुरी आह्वान गरेको हो । 

सरकारले नियुक्तिका लागि सिफारिस गरेको र संसदीय सुनुवाइका लागि समितिमा पत्र प्राप्त हुन आएकाले सूचना प्रकाशन गरिएको सूचनामा जनाइएको छ ।

१२ वैशाखभित्र उजुरी दिन आह्वान गरिएको छ । त्यसपछि संसदीय सुनुवाइ हुनेछ । समितिको कार्यालय सिंहदरबार, इमेल, हुलाक तथा जिल्ला प्रशासन कार्यालयबाट समेत उजुरी दर्ता गर्न सकिने सूचनामा उल्लेख छ ।

२४ चैतको मन्त्रिपरिषद्को बैठकले परराष्ट्र सेवाका ८ सहित २० जनालाई राजदूत नियुक्तिका लागि सिफारिस गर्ने निर्णय गरेको थियो । संसदीय सुनुवाइ पश्चात् राष्ट्रपतिबाट राजदूत नियुक्त हुने व्यवस्था छ ।