गाउँ सहर

ट्रक दुर्घटना हुँदा एक जनाकाे ज्यान गयाे, पाँच घाइते

• गाउँ सहर संवाददाता
• ७ चैत सोमबार, २०७८ | १२:१३:०० मा प्रकाशित

काठमाडाैं । ट्रक दुर्घटना हुँदा एक जनाको मृत्यु भएको छ । बैतडीमा ट्रक दुर्घटना हुँदा एक जनाको मृत्यु भएको हाे भने पाँच घाइते भएका छन् । मृत्यु हुनेमा सुर्नया गाउँपालिका–३ की २५ वर्षीया दुर्गा चन्द रहेकी इलाका प्रहरी कार्यालय पाटनका प्रमुख, प्रहरी निरीक्षक राजेश शाहीले जानकारी दिएका छन् । 

गए राति दशरथचन्द राजमार्गअन्तर्गत पाटन नगरपालिका–६ मा से१ख १२४२ नम्बरको मिनी ट्रक दुर्घटना भएको थियो । दुर्घटनामा सख्त घाइते चन्दको उपचारका क्रममा डडेल्धुरा अस्पतालमा मृत्यु भएको प्रहरीले जनाएकाे छ । 

घाइते हुनेमा सुर्नया गाउँपालिका–३ की ३५ वर्षीया माधवी चन्द, ३५ वर्षीया वसन्ती भट्ट, ३३ वर्षीया कलावती भट्ट, २८ वर्षीया विमला चन्द र २३ वर्षीया पार्वती विष्ट छन् । माधवी, वसन्ती र कलावतीको डडेल्धुरा अस्पतालमा तथा विमला र पार्वतीको पाटन प्राथमिक स्वास्थ्य केन्द्रमा उपचार भइरहेको छ । पाटनबाट घर पोत्ने रातो माटो लिएर फर्किरहेको मिनी ट्रक सडकको नालीमा पल्टिएको हो । चालक पाटन नगरपालिका–४ का वीरेन्द्र खत्री फरार छन् ।

घटनाका सम्बन्धमा प्रहरीले थप अनुसन्धान गरिरहेकाे र चालककाे खाेजी भइरहेकाे बताएकाे छ ।