अर्थतन्त्र

नेप्सेमा दाेहाेराे अंककाे वृद्धि, ३ अर्ब २१ करोडको माथिकाे कारोबार

• गाउँ सहर संवाददाता
• १० फाल्गुण मंगलबार, २०७८ | १५:२१:०० मा प्रकाशित

काठमाडाैं । नेप्सेमा साताको कारोबारको तेस्रो दिन मंगलबार  दोहोरो अंकले वृद्धि भएको छ । आज नेप्से १७.४२  अंकले बढेर दुई हजार सात सय ३५ दशमलब ९३ विन्दुमा पुगेको हो । सोमबार नेप्से २५.२१ अंकले बढेर दुई हजार सात सय १८ दशमलब ३१ विन्दुमा पुगेको थियो ।   

आज कारोबार रकममा सामान्य वृद्धि भएको छ  । आज ३ अर्ब २१ करोड २८ लाख बराबरको कारोबार भएको नेप्सेले जानकारी दिएकाे छ । सोमबार २ अर्ब ९९ करोड ७२ लाख बराबरको कारोबार भएको थियो ।      

दुई कम्पनीको शेयरमूल्यमा उच्च वृद्धि भएको छ । शेयरमूल्यमा वृद्धि हुने कम्पनीमा मैलुङ खोला जलविद्युत कम्पनी र युनाइटेड इदी मर्दी हाइड्रोपावर रहेको छ । मैलुङ खोला जलविद्युत कम्पनीको शेयरमूल्य आज १० प्रतिशतले बढेर प्रतिकित्ता ६८२ रुपैयाँ कायम भएको छ । त्यस्तै, युनाइटेड कम्पनीको शेयरमूल्य आज ९.९९ प्रतिशतले बढेर प्रतिकित्ता ९१८.३० रुपैयाँ पुगेको नेप्सेले जनाएकाे छ । 

नेप्सेका अनुसार आज सिभिल लघुवित्त वित्तीय संस्था, नेपाल हाइड्रो र प्राइम लाइफ इन्स्योरेन्स कम्पनीको शेयरमूल्यमा सर्वाधिक गिरावट आएको छ । यी कम्पनीको शेयरमूल्य एक प्रतिशत भन्दा बढीले घटेको छ । कारोबारको आधारमा आज सबैभन्दा बढी नेपाल दुरसञ्चार कम्पनीको भएको छ । यस कम्पनीको आज २१ करोड ४९ लाख भन्दा बढीको कारोबार भएको छ ।