राजनीति

बालुवाटारमा गठबन्धनको बैठक सुरु

काठमाडाैं । प्रधानमन्त्री निवास बालुवाटारमा सत्ता गठबन्धनका दलहरूको बैठक सुरु भएको छ । संसदमा विचाराधीन एमसीसी प्रस्ताव टेबल गर्नका लागि सहमति जुटाउने प्रयास स्वरुप सत्ता गठबन्धनको बैठक बसेको हो । 

बैठकमा प्रधानमन्त्री देउवासहित माओवादी केन्द्रका अध्यक्ष प्रचण्ड, नेकपा एकीकृत समाजवादीका अध्यक्ष माधव कुमार नेपाल, जसपाका अध्यक्ष उपेन्द्र यादवलगायतका नेताहरु सहभागी छन् ।  गठबन्धन बैठकअघि प्रधानमन्त्री देउवाले आफू निकट नेताहरुसँग आन्तरिक छलफल गरेका थिए ।

एमसीसीका बारेमा सत्तारुढ पाँच दलीय गठबन्धनमा फरक फरक धारणा रहेको छ । काँग्रेस जसरी पनि एमसीसी टेबल गर्ने पक्षमा छन् भने नेकपा माओवादी केन्द्र संशोधन बिना एमसीसी टेबल हुन नसक्ने पक्षमा रहेको छ । यस्तै नेकपा एकीकृत समाजवादी पार्टी टेबल गर्न दिने तर पारित गर्न नसघाउने पक्षमा हुँदा जसपामा पनि दुई धार रहेको छ।  यस्तै राष्ट्रिय जनमोर्चा सुरुदेखि नै एमसीसीको विपक्षमा रहेको छ ।

प्रधानमन्त्री देउवा पछिल्लो पटक फागुन १६ भित्रै सदनबाट एमसीसी अनुमोदन गरेर जाने पक्षमा जुटिरहेका छन् । त्यही क्रममा उनले फागुन ४, फागुन ६ को संसद बैठकमै एमसीसी टेवल गर्न कसरथ गरेका थिए । तर सत्तामै रहेको माओवादी केन्द्र र नेकपा एकीकृत समाजवादी तयार नहुँदा अल्झिरहेको थियो । आजको सत्ता गठबन्धन दलको बैठकमा सहमति नजुटेपनि प्रधानमन्त्री संसदमा टेवल गरेर जाने तयारीमा छन् ।

तर ६ फागुनको बैठकमा नेकपा एसले आज सम्मको समय माग गरेकोले सत्ता गठबन्धनको बैठक आज फेरि बसेको हो । नेकपा एसले संसदमा टेबल गर्न सहमति दिने निर्णय हिजोको स्थायी समिति बैठकबाट गरेको छ । माओवादी केन्द्रका अध्यक्ष प्रचण्ड र नेकपा एसका अध्यक्ष माधव नेपाल नेपाल निवासमा भेटघाट गरेर बालुवाटार पुगेका थिए । अव आजको बैठकमा संसदमा जान सहमति दिने तयारीमा सत्ता गठबन्धन दलका अन्य घटक पनि पुगेको बताईएको छ ।

गठबन्धनमा सहमती हुन सके आजै संसद बैठकमा एमसीसी टेबल गर्ने प्रधानमन्त्रीको योजना छ ।

गाउँ सहर संवाददाता

तपाईँको मत