गाउँ सहर

माघी पर्वका अवसरमा सार्वजनिक बिदा दिन माग

काठमाडाैं । माघी पर्वका अवसरमा सार्वजनिक बिदा दिनु पर्ने माग राखिएकाे छ । शुक्लाफाँटा नगरपालिकाका थारु समुदायले माघी पर्वका अवसरमा सार्वजनिक बिदा दिनु पर्ने माग राखेका हुन् । उनीहरुले तीन दिन सार्वजनिक बिदा दिन माग गरेका छन् ।

सार्वजनिक बिदाको माग गर्दै उनीहरूले नगरपालिका कार्यालय पुगेर नगर प्रमुखलगायतको ध्यानाकर्षण गराएका थिए । आदिवासी जनजाति संघ र नेपाल आदिवासी जनजाति महासंघमा आबद्ध पदाधिकारीले यही पुस ३०, आगामी माघ १ र २ गते बिदा दिन माग गरेका छन् ।

“बुधबार नगर प्रमुखलगायतलाई भेटेर माघी पर्व एवंं थारु समुदायको नयाँ वर्ष थारु सम्वत् २६४५ को अवसरमा बिदा दिनुपर्ने लिखित रुपमै माग गरेका छौँ”, आदिवासी जनजाति संघका सभापति हवलदार चौधरीले भने, “नगर प्रमुखले यसबारे सकारात्मक जफाव दिनु भएको छ ।”

नगर प्रमुख दिलबहादुर ऐरले थारु समुदायको महान पर्व माघीका अवसरमा नगरपालिकाभित्र बिदा दिने सम्बन्धमा कार्यपालिका सदस्यसँग छलफल गरी निष्कर्षमा पुगिने बताएका छन् ।

गाउँ सहर संवाददाता