विश्व

पछिल्लाे २४ घण्टामा भारतमा १ लाख ८० हजार कोरोना संक्रमित थपिए

• गाउँ सहर संवाददाता
• २६ पौष सोमबार, २०७८ | १४:११:०० मा प्रकाशित

काठमाडाैं । भारतमा दैनिक कोरोना  संक्रमितको संख्या १ लाख ८० हजार नजिक पुगेको छ ।

सोमबार कोभिड-१९ का एक लाख ७९ हजार ७२३ नयाँ संक्रमित थपिएकाे भारतको केन्द्रीय स्वास्थ्य मन्त्रालयले जनाएकाे छ । पछिल्लो २४ घण्टामा १४६ जना संक्रमितको मृत्यु भएको मन्त्रालयले जनाएको छ ।

थपिएका संक्रमितसँगै हाल भारतमा सक्रिय संक्रमितको संख्या ७ लाख २३ हजार ६१९ पुगेको छ । दैनिक संक्रमण दर १३.२९ प्रतिशत रहेको भारतीय समाचार माध्यमले जनाएका छन् ।

केन्द्रीय मन्त्रालयका अनुसार कोभिड-१९ को नयाँ ओमिक्रोन भेरियन्टका संक्रमित समेत बढिरहेका छन् । भारतमा हालसम्म ४ हजार ३३ जनामा यो भेरियन्टको संक्रमण पुष्टि भएको छ । ओमिक्रोनका संक्रमितमध्ये महाराष्ट्रमा सबैभन्दा धेरै छन् ।

महाराष्ट्रमा सोमबारसम्म ओमिक्रोनबाट संक्रमित हुनेको संख्या १ हजार २१६ पुगेको छ । राजस्थानमा ओमिक्रोनका संक्रमितको संख्या ५२९ पुगेको छ । हालसम्म दिल्लीमा ५१३ र कर्नाटकमा ४४१ जना यो भेरियन्टबाट संक्रमित भएकाे केन्द्रीय मन्त्रालयले बताएकाे छ ।