विश्व

प्रजातन्त्रवादी नेतृ आङ सान सूचीलाई चार वर्षको जेल सजाय

• गाउँ सहर संवाददाता
• २६ पौष सोमबार, २०७८ | १३:५८:०० मा प्रकाशित

एजेन्सी । आङ सान सूचीलाई चार वर्षको जेल सजाय सुनाएको छ । म्यानमारको सैन्य अदालतले नजरबन्दमा रहेकी प्रजातन्त्रवादी नेतृ आङ सान सूचीलाई चार वर्षको जेल सजाय सुनाएको हाे । सूचीमाथि गैर लाइसेन्सको वकीटकी राखेको आरोप छ ।

गत फेब्रुअरीमा सेनाले नागरिक सरकारमाथि सैन्य ‘कू’ गर्दै सूचीलाई सत्ताच्यूत गरेको थियो । सूचीलाई गत डिसेम्बरमा कोरोना भाइरसको प्रतिबन्ध उल्लंघन गरेका कारण चार वर्षको जेल सजाय सुनाइएको थियो । त्यसलगत्तै यो सजायलाई कम गर्दै अढाई वर्षको घरमै नजरबन्द गरिएको थियो ।

गत डिसेम्बरमा सूचीमाथि सुनाइएको सजायको अन्तर्राष्ट्रियस्तरबाट विरोध गरिएको थियो । म्यानमारका जनताहरुले यो फैसलाप्रति चिन्ता व्यक्त गर्दै विरोधको पुरानो शैली अपनाएर भाँडाकुडा बजाएका थिए ।

अदालतको निर्णयप्रति ह्युमन राइट्स वाचको शोधकर्ता मेनी मान्गले अदालतको आदेशले राष्ट्रियस्तरमा असन्तोषको विषय झन बढ्ने प्रतिक्रिया दिएकी छन् । ‘जब पछिल्लोपटक उनलाई सजाय सुनाइएको थियो, त्यो बेला म्यानमारमा सामाजिक सञ्जालमा सर्वाधिक चर्चा भएको थियो । जनता निकै रिसाएका थिए । सेनालाई अदालतको निर्णयले आम मानिसमा डर सिर्जना हुन्छ भन्ने लागेको होला । तर यसले जनतामा अझ बढी रिसको मात्रा बढाएको छ’, उनले भनेकी छन् ।