राजनीति

शेयर बजारमा उत्साह, तेस्राे दिनपनि बढ्ने क्रम जारी

• गाउँ सहर संवाददाता
• २० पौष मंगलबार, २०७८ | १६:०३:०० मा प्रकाशित

काठमाडौं । साताकाे पहिलाे दिनदेखि निरन्तर बढिरहेकाे सेयर बजार मंगलबार (आज) पनि दोहोरो अंकले बढेकाे छ । आज नेप्से परिसूचक ६३.०१ अंक बढेर २६७९.९५ विन्दुमा पुगेको छ । यस दिन सेन्सेटिभ इण्डेक्स १५.८५ अंक, फ्लोट इण्डेक्स ५.१४ अंक र सेन्सेटिभ फ्लोट इण्डेक्स ६.२८ अंक बढेको छ ।

दिनभर ९१ लाख १० हजार ७ सय ५८ कित्ता शेयर किनबेच हुँदा कारोबार रकम ४ अर्ब ३२ करोड २ लाख ६९ हजार ८ सय २७ रुपैयाँमा रोकियो । यस अघि सोमबार ४ अर्ब ५३ करोड रुपैयाँ माथिको शेयर कारोबार भएको थियो ।

यसदिन श्री इन्भेष्टमेन्ट फाइनान्स, सप्तकोशी डेभलपमेन्ट बैंक, मध्ये भोटेकोशी जलविद्युत कम्पनी, नेपाल एसबीआई बैंकको सेयर मूल्यमा सकारात्मक सर्किट लागेको छ ।

मंगलबार धेरै घट्नेहरुमा डिबेञ्चरहरु देखिएका छन् । कृषि विकास बैंकको डिबेञ्चर, नेपाल बैंकको डिबेञ्चर, आईसीएफसीको डिबेञ्चर करिब २ प्रतिशतले घटेका छन् ।

कारोबार रकमका आधारमा यस दिन नेपाल बङ्गलादेश बैंक शीर्ष स्थानमा रहेको छ । सो बैंकको यस दिन १४ करोड ७७ लाख रुपैयाँभन्दा बढीको शेयर कारोबार भएको छ । त्यसैगरी, यस दिन नबिल बैंक, अपि पावर, हिमालयन डिष्टिलरी र अपर तामाकोशीको १० करोडभन्दा बढीको शेयर कारोबार भएको छ ।

पछिल्ला दिनमा शेयर बजारमा उत्साह देखिएको छ ।