राजनीति

माओवादीको निर्वाचन कार्यतालिका संशाेधन, भाेली दिउँसाे २ बजेमात्रै निर्वाचन प्रक्रिया शुरू हुने

फाइल तस्बिर

काठमाडौं । नेकपा माओवादी केन्द्रको आठौं महाधिवेशनअन्तर्गतको निर्वाचन कार्यक्रम आइतबार दिउँसोसम्मको लागि स्थगित भएको छ । माओवादी केन्द्रको निर्वाचन आयोगका अध्यक्ष विष्णुपुकार श्रेष्ठले आइतबार दिउँसो १ बजेसम्मका लागि निर्वाचन कार्यक्रम स्थगित गरेको जानकारी दिए ।

केन्द्रीय सदस्यमा सहमति जुटाउन आयोजकहरुले समय दिनुपर्यो भनेएपछि निर्वाचन कार्यक्रम भोलि दिउँसोसम्म स्थगित गरेको बताए । उनले भोलि १ बजेसम्म सहमति भएन भने २ बजेबाट आवेदन लिने गरि निर्वाचन कार्यतालिका संशोधन गरिएको जानकारी दिए ।

यसअघि माओवादीले शनिबार राति ८ बजेदेखि साढे १० बजेसम्म केन्द्रीय सदस्यको उम्मेदवारी दर्ता र आइतबार बिहान साढे ११ देखि ४ बजेसम्मका लागि मतदानको समय तोकिएको थियो ।

अध्यक्ष पुष्पकमल दाहाल 'प्रचण्ड'ले आइतबार केन्द्रीय सदस्य र पदाधिकारी टुंग्याउने बताएका छन् । 

बन्दसत्रमा सम्बोधन गर्दै प्रचण्डले निर्वाचनबाट जाँदा सबै खाले मनोविज्ञानको सम्बोधन गर्न नसकिने भएकाले सहमतिमै केन्द्रीय कमिटीमा रहने सदस्य र पदाधिकारी टुंग्याउने बताएको एक नेताले जानकारी दिए।

‘आज राति चिसोमा बसेर मतदान गर्नुभन्दा भोलि दिउँसो सहमतिमै टुंग्याउँछौं। भोलिसम्मको समय दिनुस्,’ प्रचण्डको भनाइ थियो।

गाउँ सहर संवाददाता