राजनीति

राष्ट्रिय एकता तथा मेलमिलाप दिवसमा प्रधानमन्त्री देउवाकाे शुभकामना

काठमाडाैं । प्रधानमन्त्री तथा नेपाली कांग्रेसका सभापति शेरबहादुर देउवाले नेपालको लोकतान्त्रिक आन्दोलनमा वीपी कोइरालाले प्रतिपादन गरेको राष्ट्रिय एकता तथा मेलमिलाप नीतिको ठूलो महत्व रहेकाे बताएका छन् । 

राष्ट्रिय एकता तथा मेलमिलाप दिवसको अवसरमा शुभकामना व्यक्त गर्दै देउवाले राष्ट्रियता र लोकतन्त्रप्रति समर्पित सबै राष्ट्रिय शक्ति बीच मेलमिलाप, सम्वाद, सहमति र सहकार्य सदैव आवश्यकता रहेकाे बताएका छन् ।

नेपाली कांग्रेसले हरेक वर्ष जस्तै यसवर्ष पनि विभिन्न कार्यक्रम गरी मेलमिलाप दिवस मनाउँदै छ ।

नेपाली कांग्रेस र उसका भ्रातृसंस्थाहरुले ‘राष्ट्रिय एकता तथा मेलमिलाप दिवस’ मनाउँदै  आएको छ । पार्टीका संस्थापक नेता बीपी कोइराला, गणेशमान सिंहलगायतका नेताहरु लामो निर्वासन अन्त्य गरी भारतबाट स्वदेश फर्किएको दिन पुस १६ गतेलाई हरेक वर्ष ‘राष्ट्रिय एकता तथा मेलमिलाप दिवस’का रुपमा मनाउने गरिन्छ ।

यसै सन्दर्भमा कांग्रेसले बुधबार ७७ वटै जिल्लामा बिभिन्न कार्यक्रम गरी मेलमिलाप दिवस मनाउँदै छ ।

प्रधानमन्त्री तथा नेपाली कांग्रेसका सभापतिकाे राष्ट्रिय एकता तथा मेलमिलाप दिवसमा दिएकाे शुभकामना :

राष्ट्रिय एकता तथा मेलमिलाप दिवसको अवसरमा सबैमा हार्दिक शुभकामना व्यक्त गर्दछु । नेपाली कांग्रेसका संस्थापक नेता वीपी कोइराला राष्ट्रिय एकता तथा मेलमिलापको नीति लिएर स्वदेश फर्किनु भएको दिन हो— पुस १६ गते । वीपी कोइराला २०३३ साल पुष १६ गते तत्कालिन राजनीतिक व्यवस्थाले लगाएका ठूला–ठूला मुद्दाको पनि परवाह नगरि ज्याननै जोखिममा पारेर राष्ट्रियताको संरक्षण र लोकतन्त्रको स्थापनाको उद्देश्यका साथ देश भित्र प्रवेश गर्नु भएको थियो । नेपालको लोकतान्त्रिक आन्दोलनमा वीपी कोइरालाले प्रतिपादन गर्नु भएको राष्ट्रिय एकता तथा मेलमिलाप नीतिको ठूलो महत्व छ । यो दिनले हामी सबैलाई सधै देशभक्ति र लोकतन्त्रप्रति प्रतिवद्धताका लागि प्रेरणा दिइरहेको छ । राष्ट्रियता र लोकतन्त्रप्रति समर्पित सबै राष्ट्रिय शक्ति बीच मेलमिलाप, सम्वाद, सहमति र सहकार्य सदैव आवश्यकता हुन्छ । नेपाली कांगे्रसको राष्ट्रिय एकता तथा मेलमिलापको नीति आज पनि त्यत्तिकै सान्दर्भिक र औचित्वपूर्ण छ । यो दिवसले राजनीतिक दलहरुलाई राष्ट्रियता र लोकतन्त्रको संरक्षण र सम्बर्धनका लागि सहमति र सहकार्यका साथ अगाडि बढ्न प्रेरणा दिने मैले विश्वास लिएको छु ।

जय नेपाल !

शेरबहादुर देउवा

सभापति

गाउँ सहर संवाददाता

तपाईँको मत